ਮੋਹਾਲੀ, 9 ਸਤੰਬਰ, ਪੰਜਾਬੀ ਦੁਨੀਆ ਬਿਊਰੋ:
ਸੀਜੀਸੀ ਲਾਂਡਰਾਂ ਵੱਲੋਂ ਨਵੇਂ ਵਿਦਿਆਰਥੀਆਂ ਦੇ ਸਵਾਗਤ ਲਈ ਕਰਵਾਏ ਗਏ ਫਰੈਸ਼ਰਜ਼ ਬੈਸ਼ ‘ਜਸ਼ਨ-2026’ ਦੌਰਾਨ ਬੀਟੈਕ-ਏਆਈ ਐਂਡ ਡੀਐਸ ਦੀ ਵਿਦਿਆਰਥਣ ਭੂਮਿਕਾ ਪਾਂਡੇ ਅਤੇ ਬਾਇਓਟੈਕਨਾਲੋਜੀ ਦੇ ਪਹਿਲੇ ਸਾਲ ਦੇ ਵਿਦਿਆਰਥੀ ਹਿਮਾਂਸ਼ੂ ਨੇ ਕ੍ਰਮਵਾਰ ਮਿਸ ਅਤੇ ਮਿਸਟਰ ਫਰੈਸ਼ਰ-2026 ਦਾ ਖਿਤਾਬ ਜਿੱਤਿਆ। ਜੰਨਤ ਚੌਧਰੀ (ਬੀਟੈਕ ਸੀਐਸਈ) ਅਤੇ ਏਰਿਕ (ਬੀਟੈਕ ਏਆਈ ਐਂਡ ਐਮਐਲ) ਨੂੰ ਉਪ ਜੇਤੂ ਐਲਾਨਿਆ ਗਿਆ।
ਇਸੇ ਦੌਰਾਨ ਸ਼ਿਵਿਕਾ ਸ਼ਰਮਾ (ਬੀਟੈਕ ਸੀਐਸਈ) ਨੇ ਮਿਸ ਫੋਟੋਜੈਨਿਕ-2026 ਅਤੇ ਸਾਹਿਲ (ਬੀਬੀਏ) ਨੇ ਮਿਸਟਰ ਫੋਟੋਜੈਨਿਕ-2026 ਦਾ ਖਿਤਾਬ ਹਾਸਲ ਕੀਤਾ। ਅਰਪਨਾ ਮਨਕੋਟੀਆ ਅਤੇ ਵਤਸਲ ਸ਼ਰਮਾ ਨੂੰ ‘ਫੇਸ ਆਫ ਦਿ ਈਅਰ’ ਅਤੇ ਜਸਕਰਨ ਸਿੰਘ ਨੂੰ ‘ਗੈਲੈਂਟ ਜੈਂਟਲਮੈਨ’ ਦੇ ਖਿਤਾਬ ਨਾਲ ਸਨਮਾਨਿਤ ਕੀਤਾ ਗਿਆ।
‘ਜਸ਼ਨ-2026’ ਦੌਰਾਨ ਵਿਦਿਆਰਥੀਆਂ ਨੇ ਫੈਸ਼ਨ ਸ਼ੋਅ, ਭੰਗੜਾ, ਗਿੱਧਾ ਅਤੇ ਫਿਊਜ਼ਨ ਡਾਂਸ ਸਮੇਤ ਵੱਖ-ਵੱਖ ਸੱਭਿਆਚਾਰਕ ਪੇਸ਼ਕਾਰੀਆਂ ਰਾਹੀਂ ਆਪਣੀ ਪ੍ਰਤਿਭਾ ਦਾ ਪ੍ਰਦਰਸ਼ਨ ਕੀਤਾ। ਸਮਾਗਮ ਦੀ ਸ਼ੁਰੂਆਤ ਅੰਤਰਰਾਸ਼ਟਰੀ ਫਿਊਜ਼ਨ ਅਤੇ ਬਾਲੀਵੁੱਡ ਡਾਂਸ ਨਾਲ ਹੋਈ, ਜਿਸ ਤੋਂ ਬਾਅਦ ਪੰਜਾਬੀ ਸੱਭਿਆਚਾਰ ਦੀ ਝਲਕ ਪੇਸ਼ ਕਰਦੀਆਂ ਭੰਗੜੇ ਅਤੇ ਗਿੱਧੇ ਦੀਆਂ ਪੇਸ਼ਕਾਰੀਆਂ ਨੇ ਮਾਹੌਲ ਨੂੰ ਰੰਗੀਨ ਬਣਾ ਦਿੱਤਾ।
ਸ਼ਾਮ ਦਾ ਮੁੱਖ ਆਕਰਸ਼ਣ ਮਿਸ ਅਤੇ ਮਿਸਟਰ ਫਰੈਸ਼ਰ ਮੁਕਾਬਲਾ ਰਿਹਾ। ਮੁਕਾਬਲੇ ਵਿੱਚ ਰੈਂਪ ਵਾਕ, ਸਵੈ-ਪਛਾਣ, ਕੁਇਜ਼ ਅਤੇ ਅੰਤਿਮ ਸਵਾਲ-ਜਵਾਬ ਸਮੇਤ ਕਈ ਰਾਊਂਡ ਕਰਵਾਏ ਗਏ। ਭਾਗੀਦਾਰਾਂ ਦੀ ਬੌਧਿਕ ਯੋਗਤਾ, ਆਤਮ-ਵਿਸ਼ਵਾਸ, ਸੰਚਾਰ ਹੁਨਰ ਅਤੇ ਪੇਸ਼ਕਾਰੀ ਸ਼ੈਲੀ ਦੇ ਆਧਾਰ ’ਤੇ ਮੁਲਾਂਕਣ ਕੀਤਾ ਗਿਆ।
ਇਸ ਮੌਕੇ ਆਉਣ ਵਾਲੀ ਪੰਜਾਬੀ ਫਿਲਮ ‘ਟੁੱਟ ਪੈਨੀ ਇੰਗਲਿਸ਼ ਨੇ’ ਦੀ ਸਟਾਰ ਕਾਸਟ, ਜਿਸ ਵਿੱਚ ਅਦਾਕਾਰਾ ਮੈਂਡੀ ਤੱਖਰ ਵੀ ਸ਼ਾਮਲ ਸੀ, ਵੱਲੋਂ ਵਿਸ਼ੇਸ਼ ਪ੍ਰਮੋਸ਼ਨਲ ਪੇਸ਼ਕਾਰੀ ਕੀਤੀ ਗਈ। ਗਾਇਕ ਤੇ ਗੀਤਕਾਰ ਪੁਰਸ਼ਾਰਥ ਜੈਨ ਦੀ ਲਾਈਵ ਗਾਇਕੀ ਨੇ ਵੀ ਵਿਦਿਆਰਥੀਆਂ ਨੂੰ ਝੂਮਣ ਲਈ ਮਜਬੂਰ ਕਰ ਦਿੱਤਾ।
ਸਮਾਗਮ ਵਿੱਚ ਸੀਜੀਸੀ ਲਾਂਡਰਾਂ ਦੇ ਵਾਈਸ ਚੇਅਰਮੈਨ ਪਰਮਪਾਲ ਸਿੰਘ ਢਿੱਲੋਂ, ਕੈਂਪਸ ਡਾਇਰੈਕਟਰ ਡਾ. ਰਾਜਦੀਪ ਸਿੰਘ, ਡਾਇਰੈਕਟਰ ਵਿਦਿਆਰਥੀ ਭਲਾਈ ਅਤੇ ਸਾਬਕਾ ਵਿਦਿਆਰਥੀ ਮਾਮਲੇ ਡਾ. ਗਗਨਦੀਪ ਭੁੱਲਰ, ਵਿਭਾਗਾਂ ਦੇ ਮੁਖੀ, ਫੈਕਲਟੀ ਮੈਂਬਰ ਅਤੇ ਵਿਦਿਆਰਥੀ ਮੌਜੂਦ ਸਨ। ਅੰਤ ਵਿੱਚ ਡਾ. ਗਗਨਦੀਪ ਭੁੱਲਰ ਦੇ ਧੰਨਵਾਦੀ ਮਤੇ ਨਾਲ ਸਮਾਗਮ ਸੰਪੰਨ ਹੋਇਆ।
