ਪਹਿਲੇ ਦਿਨ ਟੇਬਲ ਟੈਨਿਸ ਮੁਕਾਬਲਿਆਂ ਵਿੱਚ ਬਜ਼ੁਰਗ ਖਿਡਾਰੀਆਂ ਨੇ ਦਿਖਾਇਆ ਭਾਰੀ ਉਤਸ਼ਾਹ
ਮੋਹਾਲੀ, 14 ਨਵੰਬਰ, ਪੰਜਾਬੀ ਦੁਨੀਆ ਬਿਊਰੋ:
ਮੋਹਾਲੀ ਸੀਨੀਅਰ ਸਿਟੀਜ਼ਨ ਐਸੋਸੀਏਸ਼ਨ (ਐੱਮ.ਐੱਸ.ਸੀ.ਏ.) ਵੱਲੋਂ 14ਵੇਂ ਡਾ. ਅਮਰਜੀਤ ਸਿੰਘ ਖਹਿਰਾ ਯਾਦਗਾਰੀ ਸਾਲਾਨਾ ਖੇਡ ਸਮਾਗਮ ਦਾ ਸ਼ਾਨਦਾਰ ਆਗਾਜ਼ ਅੱਜ ਸਥਾਨਕ ਸੈਕਟਰ-68 ਸਥਿਤ ਐੱਲ.ਏ.ਐੱਫ. ਸੈਂਟਰ ਵਿਖੇ ਹੋਇਆ। ਐਸੋਸੀਏਸ਼ਨ ਦੇ ਪ੍ਰਧਾਨ ਬ੍ਰਿਗੇਡੀਅਰ ਜੇ.ਐੱਸ. ਜਗਦੇਵ ਨੇ ਝੰਡਾ ਲਹਿਰਾ ਕੇ ਖੇਡਾਂ ਦੀ ਰਸਮੀ ਸ਼ੁਰੂਆਤ ਕੀਤੀ। ਇਸ ਮੌਕੇ ਉਨ੍ਹਾਂ ਸਮਾਗਮ ਵਿੱਚ ਹਿੱਸਾ ਲੈਣ ਵਾਲੇ ਸਮੂਹ ਖਿਡਾਰੀਆਂ ਦਾ ਵਿਸ਼ੇਸ਼ ਤੌਰ ‘ਤੇ ਧੰਨਵਾਦ ਕਰਦਿਆਂ ਉਨ੍ਹਾਂ ਦੀ ਹੌਸਲਾ ਅਫ਼ਜ਼ਾਈ ਕੀਤੀ ਅਤੇ ਮੈਂਬਰਾਂ ਦੇ ਖੇਡਾਂ ਪ੍ਰਤੀ ਉਤਸ਼ਾਹ ਦੀ ਭਰਪੂਰ ਸ਼ਲਾਘਾ ਕੀਤੀ।
ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦਿਆਂ ਐਸੋਸੀਏਸ਼ਨ ਦੇ ਸਕੱਤਰ (ਪਬਲਿਕ ਰਿਲੇਸ਼ਨ) ਹਰਿੰਦਰ ਪਾਲ ਸਿੰਘ ਹੈਰੀ ਨੇ ਦੱਸਿਆ ਕਿ 14 ਤੋਂ 22 ਨਵੰਬਰ ਤੱਕ ਚੱਲਣ ਵਾਲੇ ਇਸ ਖੇਡ ਸਮਾਰੋਹ ਦੇ ਪਹਿਲੇ ਦਿਨ ਮੈਂਬਰਾਂ ਵਿੱਚ ਭਾਰੀ ਉਤਸ਼ਾਹ ਦੇਖਣ ਨੂੰ ਮਿਲਿਆ। ਖੇਡਾਂ ਦੀ ਸ਼ੁਰੂਆਤ ਟੇਬਲ ਟੈਨਿਸ ਦੇ ਰੋਮਾਂਚਕ ਮੁਕਾਬਲਿਆਂ ਨਾਲ ਹੋਈ। ਸਕੱਤਰ (ਈਵੈਂਟਸ) ਹਰਜਿੰਦਰ ਸਿੰਘ ਨੇ ਇਸ ਖੇਡ ਨੂੰ ਸੁਚਾਰੂ ਢੰਗ ਨਾਲ ਕਰਵਾਉਣ ਲਈ ਕਨਵੀਨਰ ਕਮਲ ਗਰੋਵਰ ਅਤੇ ਕੇ.ਬੀ.ਐੱਸ. ਗੁਲਾਟੀ ਦੀ ਵਿਸ਼ੇਸ਼ ਪ੍ਰਸ਼ੰਸਾ ਕੀਤੀ।
ਪਹਿਲੇ ਦਿਨ ਦੇ ਟੇਬਲ ਟੈਨਿਸ ਮੈਚਾਂ ਦੇ ਨਤੀਜਿਆਂ ਅਨੁਸਾਰ ਪੁਰਸ਼ (60 ਪਲੱਸ) ਵਰਗ ਵਿੱਚ ਰਤਨ ਸਿੰਘ ਨੇ ਪਹਿਲਾ ਅਤੇ ਚਰਨਜੀਤ ਸਿੰਘ ਕਲੇਰ ਨੇ ਦੂਜਾ ਸਥਾਨ ਹਾਸਲ ਕੀਤਾ। ਪੁਰਸ਼ (70 ਪਲੱਸ) ਵਿੱਚ ਰਤਨ ਸਿੰਘ ਪਹਿਲੇ ਅਤੇ ਹਰਜਿੰਦਰ ਸਿੰਘ ਦੂਜੇ ਸਥਾਨ ‘ਤੇ ਰਹੇ, ਜਦਕਿ ਪੁਰਸ਼ (80 ਪਲੱਸ) ਵਿੱਚ ਹਰਕਿਰਤ ਸਿੰਘ ਨੇ ਪਹਿਲਾ ਅਤੇ ਬਲਬੀਰ ਸਿੰਘ ਨੇ ਦੂਜਾ ਸਥਾਨ ਪ੍ਰਾਪਤ ਕੀਤਾ। ਮਹਿਲਾ ਸਿੰਗਲਜ਼ ਮੁਕਾਬਲੇ ਵਿੱਚ ਡਾ. ਬਲਵਿੰਦਰ ਰਾਣਾ ਨੇ ਪਹਿਲਾ ਅਤੇ ਸ੍ਰੀਮਤੀ ਮਨਜੀਤ ਜਗਦੇਵ ਨੇ ਦੂਜਾ ਸਥਾਨ ਜਿੱਤਿਆ। ਇਸੇ ਤਰ੍ਹਾਂ ਪੁਰਸ਼ ਡਬਲਜ਼ ਵਿੱਚ ਹਰਜਿੰਦਰ ਸਿੰਘ ਤੇ ਰਤਨ ਸਿੰਘ ਦੀ ਜੋੜੀ ਨੇ ਪਹਿਲਾ ਅਤੇ ਜੇ.ਪੀ.ਐੱਸ. ਗਰੋਵਰ ਤੇ ਕੈਪਟਨ ਬਲਵੰਤ ਗੁਰਨੇ ਨੇ ਦੂਜਾ ਸਥਾਨ ਹਾਸਲ ਕੀਤਾ।
ਇਸ ਖੇਡ ਸਮਾਰੋਹ ਦੌਰਾਨ ਮੀਤ ਪ੍ਰਧਾਨ ਜਰਨੈਲ ਸਿੰਘ, ਜਨਰਲ ਸਕੱਤਰ ਸੁਖਵਿੰਦਰ ਸਿੰਘ ਬੇਦੀ, ਚੀਫ਼ ਕਨਵੀਨਰ (ਸਪੋਰਟਸ) ਜਗਦੀਪ ਸਿੰਘ, ਜੀ.ਐੱਸ. ਬਿੰਦਰਾ, ਆਰ.ਪੀ. ਸਿੰਘ ਵਿੱਗ, ਡਾ. ਜੰਗ ਸਿੰਘ ਰਾਮਗੜ੍ਹੀਆ ਅਤੇ ਨਿਰੰਜਨ ਸਿੰਘ ਵਿਸ਼ੇਸ਼ ਤੌਰ ‘ਤੇ ਹਾਜ਼ਰ ਸਨ।
ਸਮਾਗਮ ਦਾ ਸੰਚਾਲਨ ਸਕੱਤਰ (ਈਵੈਂਟਸ) ਹਰਜਿੰਦਰ ਸਿੰਘ ਵੱਲੋਂ ਬੜੇ ਸੁਚੱਜੇ ਢੰਗ ਨਾਲ ਕੀਤਾ ਗਿਆ, ਜਦਕਿ ਸਕੱਤਰ (ਆਓ-ਭਗਤ) ਬੀ.ਬੀ. ਗੁਪਤਾ ਵੱਲੋਂ ਸਮੂਹ ਮੈਂਬਰਾਂ ਲਈ ਰਿਫਰੈਸ਼ਮੈਂਟ ਦਾ ਵਧੀਆ ਪ੍ਰਬੰਧ ਕੀਤਾ ਗਿਆ।
