* 35 ਗੇਂਦਾਂ ਵਿੱਚ ਸੈਂਕੜਾ ਜੜ ਕੇ ਅਭਿਸ਼ੇਕ ਨੇ ਮਚਾਈ ਤਬਾਹੀ
* ਭਾਰਤ ਸੀਰੀਜ਼ ਵਿਚ 3-0 ਨਾਲ ਅੱਗੇ
ਚੰਡੀਗੜ੍ਹ, 27 ਅਕਤੂਬਰ (ਮਨਜੀਤ ਸਿੰਘ ਚਾਨਾ) :
ਨਿਊਜ਼ੀਲੈਂਡ ਵਿਰੁੱਧ ਵੈਲਿੰਗਟਨ ਵਿਖੇ ਖੇਡੇ ਗਏ ਤੀਜੇ ਟੀ-20 ਕੌਮਾਂਤਰੀ ਮੁਕਾਬਲੇ ਵਿੱਚ ਭਾਰਤੀ ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ ਅਤੇ 15 ਸਾਲਾ ਨੌਜਵਾਨ ਬੱਲੇਬਾਜ਼ ਵੈਭਵ ਸੂਰਿਆਵੰਸ਼ੀ ਨੇ ਅਜਿਹਾ ਤੂਫ਼ਾਨ ਲਿਆਂਦਾ ਕਿ ਮੇਜ਼ਬਾਨ ਟੀਮ ਦੇ ਗੇਂਦਬਾਜ਼ ਬੇਵੱਸ ਨਜ਼ਰ ਆਏ। ਅਭਿਸ਼ੇਕ ਨੇ ਮਹਿਜ਼ 35 ਗੇਂਦਾਂ ਵਿੱਚ ਸੈਂਕੜਾ ਪੂਰਾ ਕਰਕੇ ਜਸ਼ਨ ਮਨਾਇਆ। ਭਾਰਤ ਨੇ ਛੇ ਵਿਕਟਾਂ ਨਾਲ ਜਿੱਤ ਦਰਜ ਕਰਦਿਆਂ ਲੜੀ ਆਪਣੇ ਨਾਂ ਕਰ ਲਈ।
ਨਿਊਜ਼ੀਲੈਂਡ ਟੀਮ ਵੱਲੋਂ ਮਿੱਥੇ ਟੀਚੇ ਦਾ ਪਿੱਛਾ ਕਰਦਿਆਂ ਭਾਰਤ ਨੇ ਪਹਿਲੇ ਪੰਜ ਓਵਰਾਂ ਵਿੱਚ 100 ਦੌੜਾਂ ਬਣਾਉਣ ਦਾ ਵਿਸ਼ਵ ਰਿਕਾਰਡ ਕਾਇਮ ਕੀਤਾ ਅਤੇ ਪਾਵਰਪਲੇਅ ਵਿੱਚ 118 ਦੌੜਾਂ ਜੋੜ ਕੇ ਨਵਾਂ ਇਤਿਹਾਸ ਰਚਿਆ। ਅਭਿਸ਼ੇਕ ਅਤੇ ਸੂਰਿਆਵੰਸ਼ੀ ਨੇ ਪਹਿਲੀ ਵਿਕਟ ਲਈ ਸਿਰਫ਼ 7 ਓਵਰਾਂ ਵਿੱਚ 133 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਸੂਰਿਆਵੰਸ਼ੀ ਨੇ 18 ਗੇਂਦਾਂ ਵਿੱਚ 45 ਦੌੜਾਂ ਬਣਾਈਆਂ, ਜਦਕਿ ਅਭਿਸ਼ੇਕ ਨੇ ਆਪਣੀ ਧਮਾਕੇਦਾਰ ਪਾਰੀ ਵਿੱਚ 11 ਛੱਕੇ ਅਤੇ ਨੌਂ ਚੌਕੇ ਜੜੇ। ਉਸ ਨੇ ਗਲੇਨ ਫਿਲਿਪਸ ਹੱਥੋਂ ਕੈਚ ਹੋਣ ਤੋਂ ਪਹਿਲਾਂ ਨਿਊਜ਼ੀਲੈਂਡ ਦੇ ਗੇਂਦਬਾਜ਼ਾਂ ਦੀ ਰੱਜ ਕੇ ਧੁਲਾਈ ਕੀਤੀ।
ਪਹਿਲੇ ਹੀ ਓਵਰ ਵਿੱਚ ਜੈਕਬ ਡਫੀ ਦੀਆਂ ਗੇਂਦਾਂ ’ਤੇ ਭਾਰਤ ਨੇ 26 ਦੌੜਾਂ ਬਟੋਰ ਕੇ ਆਪਣਾ ਇਰਾਦਾ ਸਪੱਸ਼ਟ ਕਰ ਦਿੱਤਾ ਸੀ। ਐਡਮ ਮਿਲਨ ਨੇ ਦੂਜੇ ਓਵਰ ਵਿੱਚ 17 ਦੌੜਾਂ ਦਿੱਤੀਆਂ, ਜਦਕਿ ਮਾਈਕਲ ਬ੍ਰੇਸਵੈੱਲ ਅਤੇ ਕਾਇਲ ਜੈਮੀਸਨ ਦੇ ਓਵਰਾਂ ਵਿੱਚ ਵੀ ਕ੍ਰਮਵਾਰ 21 ਅਤੇ 20 ਦੌੜਾਂ ਬਣੀਆਂ। ਸੂਰਿਆਵੰਸ਼ੀ ਨੇ ਚਾਰ ਛੱਕੇ ਲਗਾ ਕੇ ਆਪਣੀ ਪ੍ਰਤਿਭਾ ਦਾ ਸਬੂਤ ਦਿੱਤਾ, ਪਰ ਰਾਤ ਪੂਰੀ ਤਰ੍ਹਾਂ ਅਭਿਸ਼ੇਕ ਦੇ ਨਾਂ ਰਹੀ।
ਇਸ ਤੋਂ ਪਹਿਲਾਂ ਨਿਊਜ਼ੀਲੈਂਡ ਨੇ ਡੈਰਿਲ ਮਿਸ਼ੇਲ ਦੀ ਸ਼ਾਨਦਾਰ 89 ਦੌੜਾਂ ਦੀ ਪਾਰੀ ਸਦਕਾ ਨਿਰਧਾਰਤ 20 ਓਵਰਾਂ ਵਿੱਚ ਤਿੰਨ ਵਿਕਟਾਂ ’ਤੇ 198 ਦੌੜਾਂ ਬਣਾਈਆਂ। ਮਿਸ਼ੇਲ ਨੇ 52 ਗੇਂਦਾਂ ਦਾ ਸਾਹਮਣਾ ਕਰਦਿਆਂ ਪੰਜ ਛੱਕੇ ਅਤੇ ਪੰਜ ਚੌਕੇ ਜੜੇ। ਫਿਨ ਐਲਨ ਨੇ 25 ਗੇਂਦਾਂ ਵਿੱਚ 40 ਦੌੜਾਂ ਬਣਾਈਆਂ ਅਤੇ ਦੂਜੀ ਵਿਕਟ ਲਈ ਮਿਸ਼ੇਲ ਨਾਲ 86 ਦੌੜਾਂ ਜੋੜੀਆਂ।
ਅਰਸ਼ਦੀਪ ਸਿੰਘ ਨੇ ਟਿਮ ਸੀਫਰਟ ਨੂੰ ਆਊਟ ਕਰਕੇ ਭਾਰਤ ਨੂੰ ਚੰਗੀ ਸ਼ੁਰੂਆਤ ਦਿਵਾਈ। ਨਿਤੀਸ਼ ਕੁਮਾਰ ਰੈੱਡੀ ਨੇ ਐਲਨ ਦੀ ਵਿਕਟ ਲਈ, ਜਦਕਿ ਅਕਸ਼ਰ ਪਟੇਲ ਨੇ ਗਲੇਨ ਫਿਲਿਪਸ ਨੂੰ ਪੈਵੇਲੀਅਨ ਭੇਜਿਆ, ਜਦਕਿ ਬੇਵੋਨ ਜੈਕਬਜ਼ ਨੇ ਅਜੇਤੂ 39 ਦੌੜਾਂ ਬਣਾਈਆਂ।
ਭਾਰਤ ਨੇ ਇਸ ਜਿੱਤ ਨਾਲ ਨਿਊਜ਼ੀਲੈਂਡ ਦੀ ਧਰਤੀ ’ਤੇ ਟੀ-20 ਲੜੀਆਂ ਜਿੱਤਣ ਦੀ ਹੈਟ੍ਰਿਕ ਪੂਰੀ ਕਰ ਲਈ। ਇਸ ਤੋਂ ਪਹਿਲਾਂ ਭਾਰਤ ਨੇ 2020 ਵਿੱਚ 5-0 ਅਤੇ 2022 ਵਿੱਚ 1-0 ਨਾਲ ਲੜੀ ਜਿੱਤੀ ਸੀ।
