7 ਸਤੰਬਰ ਤੋਂ ਕੂੜੇ ਵਾਲੀਆਂ ਗੱਡੀਆਂ ਰੋਕਣ ਦਾ ਐਲਾਨ
ਮੋਹਾਲੀ, 16 ਅਗਸਤ, ਪੰਜਾਬੀ ਦੁਨੀਆ ਬਿਊਰੋ :
ਜਗਤਪੁਰਾ ਵਿਖੇ ਚੱਲ ਰਹੇ ਗੈਰ-ਕਾਨੂੰਨੀ ਕੂੜਾ ਪ੍ਰੋਸੈਸਿੰਗ ਪਲਾਂਟ ਕਾਰਨ ਪੈਦਾ ਹੋ ਰਹੇ ਗੰਭੀਰ ਪ੍ਰਦੂਸ਼ਣ ਅਤੇ ਸਿਹਤ ਸਮੱਸਿਆਵਾਂ ਨੂੰ ਲੈ ਕੇ ਅੱਜ ‘ਵਾਤਾਵਰਣ ਸੰਭਾਲ ਕੋਰ ਕਮੇਟੀ’ ਵੱਲੋਂ ਇਲਾਕਾ ਵਸਨੀਕਾਂ ਨਾਲ ਇੱਕ ਭਾਰੀ ਜਨਤਕ ਮੀਟਿੰਗ ਕੀਤੀ ਗਈ। ਮੀਟਿੰਗ ਦੌਰਾਨ ਲੋਕਾਂ ਨੇ ਬਦਬੂ ਅਤੇ ਜ਼ਹਿਰੀਲੀ ਹਵਾ ਤੋਂ ਨਿਜਾਤ ਪਾਉਣ ਲਈ ਇਸ ਪਲਾਂਟ ਨੂੰ ਪੱਕੇ ਤੌਰ ’ਤੇ ਬੰਦ ਕਰਨ ਦੀ ਜੋਰਦਾਰ ਮੰਗ ਕੀਤੀ।
ਕੋਰ ਕਮੇਟੀ ਦੇ ਨੁਮਾਇੰਦਿਆਂ ਨੇ ਸਪੱਸ਼ਟ ਕੀਤਾ ਕਿ ਇਹ ਇੱਕ ਪੂਰੀ ਤਰ੍ਹਾਂ ਗੈਰ-ਸਿਆਸੀ ਜਨ ਅੰਦੋਲਨ ਹੈ, ਜੋ ਕਿਸੇ ਪਾਰਟੀ ਜਾਂ ਵਿਅਕਤੀ ਵਿਰੁੱਧ ਨਹੀਂ ਬਲਕਿ ਵਸਨੀਕਾਂ ਦੀ ਸਿਹਤ ਅਤੇ ਸੁਰੱਖਿਆ ਲਈ ਲੜਿਆ ਜਾ ਰਿਹਾ ਹੈ। ਪਲਾਂਟ ਕਾਰਨ ਫੇਜ਼ 11, ਸੈਕਟਰ 48, ਇੰਡਸਟਰੀਅਲ ਏਰੀਆ ਫੇਜ਼ 9 ਅਤੇ ਪਿੰਡ ਜਗਤਪੁਰਾ, ਕੰਬਾਲੀ, ਧਰਮਗੜ੍ਹ, ਕੰਬਾਲਾ, ਰੁੜਕਾ ਸਮੇਤ ਆਸ-ਪਾਸ ਦੇ ਇਲਾਕਿਆਂ ਦੀ ਲਗਭਗ 1.5 ਤੋਂ 2 ਲੱਖ ਆਬਾਦੀ ਪ੍ਰਭਾਵਿਤ ਹੋ ਰਹੀ ਹੈ। ਲੋਕਾਂ ਨੂੰ ਸਾਹ ਲੈਣ ਵਿੱਚ ਦਿੱਕਤ ਅਤੇ ਹੋਰ ਬੀਮਾਰੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਸ ਤੋਂ ਇਲਾਵਾ, ਹਵਾਈ ਅੱਡੇ ਦੇ ਨੇੜੇ ਹੋਣ ਕਰਕੇ ਕੂੜੇ ’ਤੇ ਮੰਡਰਾਉਂਦੇ ਪੰਛੀ ਹਵਾਈ ਸੁਰੱਖਿਆ ਲਈ ਵੀ ਵੱਡਾ ਖ਼ਤਰਾ ਬਣ ਸਕਦੇ ਹਨ।
ਆਗੂਆਂ ਨੇ ਦੱਸਿਆ ਕਿ ਮੇਅਰ, ਐਮ.ਐਲ.ਏ., ਡਿਪਟੀ ਕਮਿਸ਼ਨਰ ਅਤੇ ਐਮ.ਸੀ. ਅਧਿਕਾਰੀਆਂ ਨੂੰ ਮੰਗ ਪੱਤਰ ਦੇਣ ਤੋਂ ਬਾਅਦ, ਪੰਜਾਬ ਦੇ ਰਾਜਪਾਲ ਸ੍ਰੀ ਗੁਲਾਬ ਚੰਦ ਕਟਾਰੀਆ ਨਾਲ ਵੀ ਮੁਲਾਕਾਤ ਕੀਤੀ ਗਈ ਸੀ, ਜਿਨ੍ਹਾਂ ਨੇ 15 ਦਿਨਾਂ ਵਿੱਚ ਮਸਲਾ ਹੱਲ ਕਰਨ ਦਾ ਭਰੋਸਾ ਦਿੱਤਾ ਸੀ।
ਕਮੇਟੀ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ 7 ਸਤੰਬਰ 2026 ਤੱਕ ਇਸ ਪਲਾਂਟ ਨੂੰ ਪੱਕੇ ਤੌਰ ’ਤੇ ਬੰਦ ਨਾ ਕੀਤਾ ਗਿਆ, ਤਾਂ ਵਸਨੀਕ ਸਾਂਝੇ ਤੌਰ ’ਤੇ ਕਦਮ ਚੁੱਕਦਿਆਂ ਜਗਤਪੁਰਾ ਪਲਾਂਟ ਵੱਲ ਆਉਣ ਵਾਲੀਆਂ ਕੂੜੇ ਦੀਆਂ ਗੱਡੀਆਂ ਨੂੰ ਰੋਕਣਗੇ। ਹਾਲਾਂਕਿ, ਆਮ ਆਵਾਜਾਈ ਅਤੇ ਜਨਤਕ ਸੜਕਾਂ ਨੂੰ ਬਿਲਕੁਲ ਨਹੀਂ ਛੇੜਿਆ ਜਾਵੇਗਾ।
ਇਸ ਜਨਤਕ ਰੈਲੀ ਅਤੇ ਮੀਟਿੰਗ ਵਿੱਚ ਕੋਰ ਕਮੇਟੀ ਮੈਂਬਰ ਪਵਨਜੀਤ ਸਿੰਘ ਭੰਗੂ, ਗੁਰਨਾਮ ਸਿੰਘ ਗਿੱਲ (ਕੰਬਾਲੀ), ਅਮਰਜੀਤ ਸਿੰਘ ਕੰਬਾਲੀ, ਬਖ਼ਸ਼ੀਸ਼ ਸਿੰਘ (RWA ਪ੍ਰਧਾਨ), ਕੁਲਵੰਤ ਸਿੰਘ ਕਲੇਰ (ਸਾਬਕਾ ਐਮ.ਸੀ.), ਓਮਕਾਰ ਸਿੰਘ, ਧੀਰਜ ਗੋਇਲ, ਸੰਜੀਵ ਜੋਸ਼ੀ, ਗਿਆਨ ਸਿੰਘ ਧਰਮਗੜ੍ਹ, ਗੁਰਮੇਲ ਸਿੰਘ ਮੌਜੋਵਾਲ, ਓਪਿੰਦਰਪ੍ਰੀਤ ਕੌਰ ਗਿੱਲ (ਐਮ.ਸੀ.), ਅਮਰਜੀਤ ਸਿੰਘ (ਐਮ.ਸੀ.), ਅਤੇ ਗੌਰਵ ਜੈਨ (ਐਮ.ਸੀ.) ਨੇ ਮੁੱਖ ਭੂਮਿਕਾ ਨਿਭਾਈ।
ਇਸ ਤੋਂ ਇਲਾਵਾ ਚਰਨਜੀਤ ਸਿੰਘ ਰਿਹਾਲ, ਗੁਰਸ਼ਰਨਜੀਤ ਸਿੰਘ, ਡਾ. ਮਨਿੰਦਰ ਕੌਰ, ਰਵੀ ਮਹਾਜਨ, ਸੁਖਦੀਪ ਸਿੰਘ ਖਹਿਰਾ, ਕਰਮ ਸਿੰਘ, ਗੁਰਨੈਬ ਸਿੰਘ, ਕਰਮਜੀਤ ਸਿੰਘ ਲੱਡੀ, ਸਰਦਾਰ ਹਰਜੀਤ ਸਿੰਘ (ਪ੍ਰਧਾਨ, ਗੁਰਦੁਆਰਾ ਸਿੰਘ ਸਭਾ, ਫੇਜ਼ 11), ਨਰਪਿੰਦਰ ਸਿੰਘ ਰੰਗੀ (ਐਮ.ਸੀ.), ਬਲਵਿੰਦਰ ਸਿੰਘ, ਜੀ.ਐਸ. ਕਲਸੀ ਅਤੇ ਰਾਜ ਕੁਮਾਰ ਸ਼ਾਹੀ ਸਮੇਤ ਵੱਡੀ ਗਿਣਤੀ ਵਿੱਚ ਸਨਮਾਨਯੋਗ ਮੈਂਬਰਾਂ ਅਤੇ ਇਲਾਕਾ ਵਾਸੀਆਂ ਨੇ ਸ਼ਮੂਲੀਅਤ ਕਰਕੇ ਅੰਦੋਲਨ ਨੂੰ ਪੂਰਨ ਸਮਰਥਨ ਦਿੱਤਾ।
