ਜ਼ਿੰਬਾਬਵੇ ਨੇ ਸੁਪਰ-8 ਲਈ ਕੁਆਲੀਫਾਈ ਕੀਤਾ
ਪੱਲੇਕੇਲੇ, 17 ਫਰਵਰੀ, ਪੰਜਾਬੀ ਦੁਨੀਆ ਬਿਊਰੋ :
ਆਈਸੀਸੀ ਟੀ20 ਵਿਸ਼ਵ ਕੱਪ 2026 ਵਿੱਚ ਇੱਕ ਵੱਡਾ ਉਲਟਫੇਰ ਦੇਖਣ ਨੂੰ ਮਿਲਿਆ ਹੈ। ਪੱਲੇਕੇਲੇ (ਸ੍ਰੀਲੰਕਾ) ਦੇ ਮੈਦਾਨ ਵਿਖੇ ਜ਼ਿੰਬਾਬਵੇ ਅਤੇ ਆਇਰਲੈਂਡ ਵਿਚਾਲੇ ਖੇਡਿਆ ਜਾਣ ਵਾਲਾ ਟੂਰਨਾਮੈਂਟ ਦਾ 32ਵਾਂ ਮੈਚ ਮੀਂਹ ਕਾਰਨ ਰੱਦ ਕਰ ਦਿੱਤਾ ਗਿਆ। ਮੈਚ ਰੱਦ ਹੋਣ ਕਾਰਨ ਦੋਵਾਂ ਟੀਮਾਂ ਨੂੰ ਇੱਕ-ਇੱਕ ਅੰਕ ਦਿੱਤਾ ਗਿਆ, ਜਿਸ ਸਦਕਾ ਜ਼ਿੰਬਾਬਵੇ ਦੀ ਟੀਮ ਵਿਸ਼ਵ ਕੱਪ ਦੇ ਸੁਪਰ-8 ਵਿਚ ਪਹੁੰਚ ਗਈ ਅਤੇ ਆਸਟ੍ਰੇਲੀਆ ਦੀ ਟੀਮ ਵਿਸ਼ਵ ਕੱਪ ‘ਚੋਂ ਬਾਹਰ ਹੋ ਗਈ।
ਭਾਵੇਂਕਿ ਇਸ ਮੈਚ ਵਿੱਚ ਇੱਕ ਵੀ ਗੇਂਦ ਨਹੀਂ ਸੁੱਟੀ ਗਈ, ਪਰ ਇਸ ਦੇ ਨਤੀਜੇ ਨੇ ਪੂਰੇ ਵਿਸ਼ਵ ਕੱਪ ਦਾ ਸਮੀਕਰਨ ਬਦਲ ਕੇ ਰੱਖ ਦਿੱਤਾ ਹੈ। ਗਰੁੱਪ ਸਟੇਜ ਵਿੱਚ ਆਪਣੇ ਦੋ ਮਹੱਤਵਪੂਰਨ ਮੈਚ ਹਾਰਨ ਤੋਂ ਬਾਅਦ ਆਸਟ੍ਰੇਲੀਆ ਦੀ ਸਥਿਤੀ ਪਹਿਲਾਂ ਹੀ ਨਾਜ਼ੁਕ ਸੀ ਅਤੇ ਹੁਣ ਜ਼ਿੰਬਾਬਵੇ ਦੇ ਸੁਪਰ-8 ਵਿੱਚ ਪਹੁੰਚਣ ਨਾਲ ਆਸਟ੍ਰੇਲੀਆਈ ਟੀਮ ਦੀਆਂ ਸਾਰੀਆਂ ਉਮੀਦਾਂ ‘ਤੇ ਪਾਣੀ ਫਿਰ ਗਿਆ ਹੈ।
ਗਰੁੱਪ-ਬੀ ਵਿੱਚ ਸ੍ਰੀਲੰਕਾ ਅਤੇ ਜ਼ਿੰਬਾਬਵੇ ਸੁਪਰ-8 ਲਈ ਕੁਆਲੀਫਾਈ ਕਰ ਚੁੱਕੇ ਹਨ। ਆਸਟ੍ਰੇਲੀਆ ਦਾ ਹੁਣ ਆਖਰੀ ਲੀਗ ਮੈਚ ਓਮਾਨ ਦੇ ਵਿਰੁੱਧ ਹੋਣਾ ਹੈ, ਜਿਸ ਵਿੱਚ ਜਿੱਤ-ਹਾਰ ਨਾਲ ਆਸਟ੍ਰੇਲੀਆ ਨੂੰ ਕੋਈ ਫਰਕ ਨਹੀਂ ਪਏਗਾ। ਇਹ ਮੁਕਾਬਲਾ ਹੁਣ ਇੱਕ ਰਸਮੀ ਕਾਰਵਾਈ ਮਾਤਰ ਰਹਿ ਗਿਆ ਹੈ।
