ਕਿਹਾ, ਚੋਣ ਕਮਿਸ਼ਨ ਨਾਲ ਮਿਲੀਭੁਗਤ ਕਰਕੇ ਭਾਜਪਾ ਜਿੱਤ ਰਹੀ ਚੋਣਾਂ
ਨਵੀਂ ਦਿੱਲੀ, 7 ਅਗਸਤ, ਪੰਜਾਬੀ ਦੁਨੀਆ ਬਿਊਰੋ:
ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਆਗੂ ਰਾਹੁਲ ਗਾਂਧੀ ਨੇ ਅੱਜ ਵੀਰਵਾਰ ਨੂੰ ਵੱਡਾ ਖੁਲਾਸਾ ਕਰਦਿਆਂ ਭਾਰਤ ਦੇ ਚੋਣ ਕਮਿਸ਼ਨ ‘ਤੇ “ਅਪਰਾਧਿਕ ਧੋਖਾਧੜੀ” ਅਤੇ “ਵੋਟ ਚੋਰੀ” ਕਰਨ ਲਈ ਭਾਜਪਾ ਨਾਲ ਮਿਲੀਭੁਗਤ ਦਾ ਦੋਸ਼ ਲਗਾਇਆ ਹੈ। ਇਸ ਖਬਰ ਨਾਲ ਪੂਰੇ ਦੇਸ਼ ਵਿੱਚ ਸਨਸਨੀ ਫੈਲ ਗਈ ਹੈ।
ਰਾਹੁਲ ਗਾਂਧੀ ਨੇ ਦਾਅਵਾ ਕੀਤਾ ਹੈ ਕਿ ਬੰਗਲੌਰ ਸੈਂਟਰਲ ਲੋਕ ਸਭਾ ਹਲਕੇ ਦੇ ਅਧੀਨ ਮਹਾਦੇਵਪੁਰਾ ਵਿਧਾਨ ਸਭਾ ਸੀਟ ‘ਤੇ ਡੁਪਲੀਕੇਟ ਵੋਟਰਾਂ ਅਤੇ ਨਵੇਂ ਨਾਮਾਂਕਣ ਲਈ ਫਾਰਮ 6 ਦੀ ਦੁਰਵਰਤੋਂ ਰਾਹੀਂ 1,00,250 “ਜਾਅਲੀ ਵੋਟਾਂ” ਬਣਾਈਆਂ ਗਈਆਂ ਸਨ, ਤਾਂ ਜੋ ਭਾਜਪਾ ਦੀ ਜਿੱਤ ਯਕੀਨੀ ਬਣਾਈ ਜਾ ਸਕੇ।
ਇਕ ਪ੍ਰੈਸ ਕਾਨਫਰੰਸ ਦੌਰਾਨ ਰਾਹੁਲ ਗਾਂਧੀ ਨੇ ਦੱਸਿਆ ਕਿ ਬੰਗਲੌਰ ਸੈਂਟਰਲ ਲੋਕ ਸਭਾ ਹਲਕੇ ਵਿੱਚ 13 ਲੱਖ ਵੋਟਾਂ ਪਈਆਂ, ਜਿਸ ਵਿੱਚ ਭਾਜਪਾ ਦੇ ਪੀਸੀ ਮੋਹਨ ਨੇ ਕਾਂਗਰਸ ਉਮੀਦਵਾਰ ਮਨਸੂਰ ਅਲੀ ਖਾਨ ਨੂੰ 32,707 ਵੋਟਾਂ ਨਾਲ ਹਰਾਇਆ।
ਕਰਨਾਟਕ ਵਿਧਾਨ ਸਭਾ ਸੀਟ ‘ਤੇ ਵੋਟਰ ਸੂਚੀਆਂ ਵਿੱਚ ਹੇਰਾਫੇਰੀ ਦੇ ਰਾਹੁਲ ਗਾਂਧੀ ਦੇ ਦੋਸ਼ਾਂ ਤੋਂ ਤੁਰੰਤ ਬਾਅਦ, ਕਰਨਾਟਕ ਦੇ ਮੁੱਖ ਚੋਣ ਅਧਿਕਾਰੀ ਨੇ ਉਨ੍ਹਾਂ ਨੂੰ ਸਹੁੰ ਚੁੱਕ ਕੇ ਆਪਣੇ ਸਬੂਤ ਪੇਸ਼ ਕਰਨ ਲਈ ਕਿਹਾ ਹੈ। ਆਪਣੇ ਪੱਤਰ ਵਿੱਚ, ਸੀਈਓ ਕੁਮਾਰ ਨੇ ਦੱਸਿਆ ਕਿ “ਚੋਣ ਸੂਚੀਆਂ ਪਾਰਦਰਸ਼ੀ ਢੰਗ ਨਾਲ ਤਿਆਰ ਕੀਤੀਆਂ ਜਾਂਦੀਆਂ ਹਨ” ਅਤੇ ਕਾਂਗਰਸ ਪ੍ਰਤੀਨਿਧੀ ਨਾਲ ਸਾਂਝੀਆਂ ਕੀਤੀਆਂ ਜਾਂਦੀਆਂ ਹਨ।
