ਨਵੀਂ ਦਿੱਲੀ, 22 ਅਗਸਤ, ਪੰਜਾਬੀ ਦੁਨੀਆ ਬਿਊਰੋ:
ਟਰਾਂਸਪੋਰਟ ਮੰਤਰਾਲੇ ਨੇ 20 ਸਾਲ ਤੋਂ ਪੁਰਾਣੇ ਮੋਟਰ ਵਾਹਨਾਂ ਲਈ ਰਜਿਸਟ੍ਰੇਸ਼ਨ ਨਵੀਨੀਕਰਨ ਫੀਸ ਵਧਾ ਦਿੱਤੀ ਹੈ। ਇਸ ਦਾ ਅਸਲ ਕਾਰਨ, ਆਮ ਲੋਕਾਂ ਵਿੱਚ ਇਹਨਾਂ ਨੂੰ ਰੱਖਣ ਤੋਂ ਰੋਕਣਾ ਹੈ।
ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰਾਲੇ (MORTH) ਨੇ ਇੱਕ ਨੋਟੀਫਿਕੇਸ਼ਨ ਵਿੱਚ ਐਲਾਨ ਕੀਤਾ ਹੈ ਕਿ 20 ਸਾਲ ਤੋਂ ਪੁਰਾਣੇ ਹਲਕੇ ਮੋਟਰ ਵਾਹਨਾਂ (LMVs) ਲਈ ਨਵੀਨੀਕਰਨ ਫੀਸ 5,000 ਰੁਪਏ ਤੋਂ ਦੁੱਗਣੀ ਕਰਕੇ 10,000 ਰੁਪਏ ਕਰ ਦਿੱਤੀ ਗਈ ਹੈ।ਸੂਚਨਾ ਅਨੁਸਾਰ, 20 ਸਾਲ ਤੋਂ ਪੁਰਾਣੇ ਮੋਟਰਸਾਈਕਲਾਂ ਲਈ, ਨਵੀਨੀਕਰਨ ਫੀਸ 1,000 ਰੁਪਏ ਤੋਂ ਵੱਧ ਕੇ 2,000 ਰੁਪਏ ਹੋ ਜਾਵੇਗੀ। ਤਿੰਨ-ਪਹੀਆ ਵਾਹਨਾਂ ਅਤੇ ਕਵਾਡਰੀਸਾਈਕਲਾਂ ਲਈ, ਨਵੀਨੀਕਰਨ ਦੀ ਲਾਗਤ 3,500 ਰੁਪਏ ਤੋਂ ਵੱਧ ਕੇ 5,000 ਰੁਪਏ ਹੋ ਜਾਵੇਗੀ।
ਇਸੇ ਤਰ੍ਹਾਂ ਆਯਾਤ ਕੀਤੇ ਦੋ-ਪਹੀਆ ਵਾਹਨਾਂ ਦੇ ਮਾਮਲੇ ਵਿੱਚ, ਰਜਿਸਟ੍ਰੇਸ਼ਨ ਸਰਟੀਫਿਕੇਟ ਦੇ ਨਵੀਨੀਕਰਨ ਦੀ ਲਾਗਤ 20,000 ਰੁਪਏ ਹੋਵੇਗੀ, ਜਦੋਂ ਕਿ ਚਾਰ ਜਾਂ ਵੱਧ ਪਹੀਆਂ ਵਾਲੇ ਆਯਾਤ ਵਾਹਨਾਂ ਲਈ, ਇਹ 80,000 ਰੁਪਏ ਹੋਵੇਗੀ।
ਦੱਸਣਯੋਗ ਹੈ ਕਿ ਸੋਧ ਦਾ ਖਰੜਾ ਫਰਵਰੀ ਵਿੱਚ ਜਾਰੀ ਕੀਤਾ ਗਿਆ ਸੀ ਅਤੇ 21 ਅਗਸਤ ਨੂੰ ਅੰਤਿਮ ਰੂਪ ਦਿੱਤਾ ਗਿਆ ਸੀ।
