30 ਫ਼ੀਸਦੀ ਮਰੀਜ਼ਾਂ ’ਚ ਕੈਂਸਰ ਦੇ ਵਧੇਰੇ ਖ਼ਤਰੇ ਨਾਲ ਜੁੜੇ ਜੈਨੇਟਿਕ ਬਦਲਾਅ
95 ਫ਼ੀਸਦੀ ਬਦਲਾਅ ਛਾਤੀ ਤੇ ਅੰਡਕੋਸ਼ ਦੇ ਕੈਂਸਰ ਨਾਲ ਸਬੰਧਤ
ਚੰਡੀਗੜ੍ਹ, 15 ਅਕਤੂਬਰ, ਪੰਜਾਬੀ ਦੁਨੀਆ ਬਿਊਰੋ :
ਹੋਮੀ ਭਾਭਾ ਕੈਂਸਰ ਹਸਪਤਾਲ ਅਤੇ ਖੋਜ ਕੇਂਦਰ (ਐੱਚਬੀਸੀਐੱਚ ਐਂਡ ਆਰਸੀ), ਨਿਊ ਚੰਡੀਗੜ੍ਹ ਦੀ ਕੈਂਸਰ ਜੈਨੇਟਿਕਸ ਕਲੀਨਿਕ ਨੇ ਉੱਤਰੀ ਭਾਰਤ ਦੇ 1,000 ਤੋਂ ਵੱਧ ਪਰਿਵਾਰਾਂ ਦਾ ਮੁਲਾਂਕਣ ਕਰਕੇ ਖ਼ਾਨਦਾਨੀ ਕੈਂਸਰ ਦੀ ਪਛਾਣ ਅਤੇ ਰੋਕਥਾਮ ਵੱਲ ਅਹਿਮ ਕਦਮ ਚੁੱਕਿਆ ਹੈ। ਹਸਪਤਾਲ ਵੱਲੋਂ ਜਾਂਚੇ ਗਏ ਮੁੱਖ ਮਰੀਜ਼ਾਂ ਦੇ ਲਗਭਗ 30 ਫ਼ੀਸਦੀ ਮਾਮਲਿਆਂ ਵਿੱਚ ਕੈਂਸਰ ਦਾ ਖ਼ਤਰਾ ਵਧਾਉਣ ਨਾਲ ਜੁੜੇ ਜੈਨੇਟਿਕ ਬਦਲਾਅ ਮਿਲੇ ਹਨ। ਪਛਾਣੇ ਗਏ ਬਦਲਾਵਾਂ ਵਿੱਚੋਂ ਲਗਭਗ 95 ਫ਼ੀਸਦੀ ਛਾਤੀ ਅਤੇ ਅੰਡਕੋਸ਼ ਦੇ ਕੈਂਸਰ ਨਾਲ ਸਬੰਧਤ ਸਨ।
ਜਨਵਰੀ 2025 ਵਿੱਚ ਸ਼ੁਰੂ ਕੀਤੀ ਗਈ ਇਸ ਕਲੀਨਿਕ ਵੱਲੋਂ ਹੁਣ ਤੱਕ 1,000 ਤੋਂ ਵੱਧ ਪਰਿਵਾਰਾਂ ਦੀ ਕਾਊਂਸਲਿੰਗ ਕੀਤੀ ਗਈ ਹੈ। ਹਸਪਤਾਲ ਦੇ ਅੰਕੜਿਆਂ ਅਨੁਸਾਰ, ਇਨ੍ਹਾਂ ਵਿੱਚੋਂ 912 ਮੁੱਖ ਮਰੀਜ਼ਾਂ ਦੀ ਜੈਨੇਟਿਕ ਜਾਂਚ ਕੀਤੀ ਗਈ, ਜਦਕਿ ਖ਼ਤਰੇ ਦੀ ਸੰਭਾਵਨਾ ਵਾਲੇ 132 ਖ਼ੂਨ ਦੇ ਰਿਸ਼ਤੇਦਾਰਾਂ ਦੀ ਵੀ ਜਾਂਚ ਹੋਈ।
ਹਸਪਤਾਲ ਦੇ ਡਾਇਰੈਕਟਰ ਡਾ. ਆਸ਼ੀਸ਼ ਗੁਲੀਆ ਨੇ ਦੱਸਿਆ ਕਿ ਜੈਨੇਟਿਕ ਜਾਂਚ ਆਮ ਤੌਰ ’ਤੇ ਖ਼ੂਨ ਦੇ ਨਮੂਨੇ ਰਾਹੀਂ ਕੀਤੀ ਜਾਂਦੀ ਹੈ ਅਤੇ ਡਾਕਟਰੀ ਲੋੜ ਅਨੁਸਾਰ 26 ਤੋਂ 84 ਜੀਨਾਂ ਦੀ ਜਾਂਚ ਹੁੰਦੀ ਹੈ। ਇਸ ਨਾਲ ਮਰੀਜ਼ਾਂ ਲਈ ਵਿਅਕਤੀਗਤ ਇਲਾਜ, ਨਿਯਮਤ ਨਿਗਰਾਨੀ ਅਤੇ ਰੋਕਥਾਮ ਦੇ ਉਪਾਵਾਂ ਦੀ ਯੋਜਨਾ ਬਣਾਉਣ ਵਿੱਚ ਮਦਦ ਮਿਲਦੀ ਹੈ।
ਮੈਡੀਕਲ ਔਂਕੋਲੋਜੀ ਵਿਭਾਗ ਦੀ ਮੁਖੀ ਡਾ. ਸੀਮਾ ਗੁਲੀਆ ਨੇ ਕਿਹਾ ਕਿ ਪਰਿਵਾਰ ਵਿੱਚ ਕਈ ਮੈਂਬਰਾਂ ਨੂੰ ਕੈਂਸਰ ਹੋਣ, ਘੱਟ ਉਮਰ ਵਿੱਚ ਬਿਮਾਰੀ ਸਾਹਮਣੇ ਆਉਣ ਜਾਂ ਦੋਵੇਂ ਛਾਤੀਆਂ ਵਿੱਚ ਕੈਂਸਰ ਹੋਣ ਵਰਗੇ ਮਾਮਲਿਆਂ ਵਿੱਚ ਜੈਨੇਟਿਕ ਕਾਊਂਸਲਿੰਗ ਲੈਣੀ ਚਾਹੀਦੀ ਹੈ।
ਹਸਪਤਾਲ ਨੇ ਸੰਗਰੂਰ ਕੇਂਦਰ ਵਿੱਚ ਵੀ ਇਹ ਕਲੀਨਿਕ ਸ਼ੁਰੂ ਕੀਤੀ ਹੈ। ਫਿਲਹਾਲ ਜਾਂਚ ਲਈ ਨਮੂਨੇ ਟਾਟਾ ਮੈਮੋਰੀਅਲ ਸੈਂਟਰ, ਮੁੰਬਈ ਭੇਜੇ ਜਾਂਦੇ ਹਨ। ਹਸਪਤਾਲ ਵਿੱਚ ਹੀ ਜੈਨੇਟਿਕ ਜਾਂਚ ਦੀ ਸਹੂਲਤ ਸਥਾਪਤ ਕਰਨ ਲਈ ਯਤਨ ਜਾਰੀ ਹਨ।
