ਚੰਡੀਗੜ੍ਹ, 28 ਅਪ੍ਰੈਲ, ਪੰਜਾਬੀ ਦੁਨੀਆ ਬਿਊਰੋ:
ਬੀਤੀ ਸ਼ਾਮ ਪ੍ਰਾਚੀਨ ਕਲਾ ਕੇਂਦਰ ਦੇ ਐੱਮ.ਐੱਲ.ਕੌਸਰ ਆਡੀਟੋਰੀਅਮ ਵਿਖੇ ਪੰਜਾਬ ਘਰਾਣੇ ਦੇ ਦੋ ਨੌਜਵਾਨ ਕਲਾਕਾਰਾਂ ਵੱਲੋਂ ਸੋਲੋ ਤਬਲਾ ਵਾਦਨ ਦੀ ਪੇਸ਼ਕਾਰੀ ਕੀਤੀ ਗਈ। ਪੰਡਿਤ ਸੁਸ਼ੀਲ ਜੈਨ ਦੀ ਅਗਵਾਈ ਹੇਠ ਪੰਜਾਬ ਘਰਾਣੇ ਦੇ ਤਬਲਾ ਗੁਰੂ ਤੋਂ ਤਬਲਾ ਵਾਦਨ ਦੀ ਸਿਖਲਾਈ ਲੈ ਰਹੇ ਸਵਰਿਤ ਪੰਚਾਲ (ਪੁਣੇ) ਅਤੇ ਰਾਘਵ ਪ੍ਰਿਆ ਭਾਰਦਵਾਜ (ਅੰਮ੍ਰਿਤਸਰ) ਨੇ ਆਪਣੇ ਸੁਚੱਜੇ ਤਬਲਾ ਵਾਦਨ ਨਾਲ ਕਲਾ ਪ੍ਰੇਮੀਆਂ ਨੂੰ ਮੰਤਰ-ਮੁਗਧ ਕਰ ਦਿੱਤਾ। ਪੰਜਾਬ ਘਰਾਣੇ ਦੀਆਂ ਵਿਸ਼ੇਸ਼ਤਾਵਾਂ ਨੂੰ ਦਰਸਾਉਂਦੇ ਇਸ ਪ੍ਰੋਗਰਾਮ ਦਾ ਮੁੱਖ ਉਦੇਸ਼ ਪੰਜਾਬ ਘਰਾਣੇ ਦੇ ਤਬਲਾ ਵਾਦਨ ਦੇ ਮੂਲ ਬੋਲ ਅਤੇ ਰਚਨਾਵਾਂ ਨੂੰ ਸਹੀ ਢੰਗ ਨਾਲ ਪੇਸ਼ ਕਰਨਾ ਸੀ।
ਦੱਸਣਯੋਗ ਹੈ ਕਿ ਇਨ੍ਹਾਂ ਦੋਵੇਂ ਕਲਾਕਾਰਾਂ ਨੇ ਛੋਟੀ ਉਮਰ ਤੋਂ ਹੀ ਗੁਰੂ ਜੀ ਪਾਸੋਂ ਤਬਲਾ ਸਿੱਖਣਾ ਸ਼ੁਰੂ ਕਰ ਦਿੱਤਾ ਸੀ ਅਤੇ ਹੁਣ ਇਹ ਦੋਵੇਂ ਪੰਜਾਬ ਘਰਾਣੇ ਦੇ ਤਬਲੇ ਦੀਆਂ ਬਾਰੀਕੀਆਂ ਸਿੱਖ ਰਹੇ ਹਨ। ਦੋਵੇਂ ਇਸ ਤੋਂ ਪਹਿਲਾਂ ਵੀ ਕਈ ਸਫਲ ਪੇਸ਼ਕਾਰੀਆਂ ਦੇ ਚੁੱਕੇ ਹਨ। ਸਵਰਿਤ ਨੇ ਪੰਜਾਬ ਘਰਾਣੇ ਵਿੱਚ ਰਚਿਤ ਝੱਪ ਤਾਲ ਵਿੱਚ ਅਮਦ, ਰੇਲੇ, ਕਾਇਦੇ, ਪਲਟੇ ਆਦਿ ਪੇਸ਼ ਕਰਕੇ ਸਰੋਤਿਆਂ ਦੀ ਵਾਹ-ਵਾਹ ਖੱਟੀ, ਉਪਰੰਤ ਤਿੰਨ ਤਾਲ ਵਿੱਚ ਵੱਖ-ਵੱਖ ਤਬਲਾ ਪੇਸ਼ਕਾਰੀ ਕੀਤੀ। ਸਵਰਿਤ ਨੇ ਆਪਣੇ ਪ੍ਰਭਾਵਸ਼ਾਲੀ ਤਬਲਾ ਵਾਦਨ ਨਾਲ ਖੂਬ ਤਾੜੀਆਂ ਬਟੋਰੀਆਂ। ਇਸ ਤੋਂ ਬਾਅਦ ਰਾਘਵ ਪ੍ਰਿਆ ਭਾਰਦਵਾਜ ਨੇ ਤਿੰਨ ਤਾਲਾਂ ਵਿੱਚ ਤਬਲਾ ਵਾਦਨ ਪੇਸ਼ ਕੀਤਾ ਅਤੇ ਰੇਲੇ, ਕਾਇਦੇ, ਪਲਟੇ ਅਤੇ ਕੁਝ ਵਿਸ਼ੇਸ਼ ਰਚਨਾਵਾਂ ਪੇਸ਼ ਕਰਕੇ ਖੂਬ ਵਾਹ-ਵਾਹ ਖੱਟੀ। ਰਾਘਵ ਨੇ ਪੰਜਾਬ ਘਰਾਣੇ ਦੀਆਂ ਕੁਝ ਵਿਸ਼ੇਸ਼ ਰਚਨਾਵਾਂ ਪੇਸ਼ ਕਰਕੇ ਸਰੋਤਿਆਂ ਦਾ ਮਨ ਮੋਹ ਲਿਆ। ਇਨ੍ਹਾਂ ਕਲਾਕਾਰਾਂ ਨੇ ਆਪਣੇ ਦਮਦਾਰ ਪ੍ਰਦਰਸ਼ਨ ਨਾਲ ਆਪਣੇ ਗੁਰੂ ਦੀ ਸਿੱਖਿਆ, ਅਨੁਸ਼ਾਸਨ ਅਤੇ ਮਿਹਨਤ ਦਾ ਬਹੁਤ ਵਧੀਆ ਪ੍ਰਦਰਸ਼ਨ ਕੀਤਾ।
ਡਾ: ਗੁਰਪ੍ਰੀਤ ਸਿੰਘ ਮੋਗਾ ਨੇ ਇਨ੍ਹਾਂ ਤਬਲਾ ਵਾਦਕਾਂ ਦਾ ਮੰਚ ‘ਤੇ ਖੂਬ ਸਾਥ ਦਿੱਤਾ।
ਅਖੀਰ ਵਿੱਚ ਕੇਂਦਰ ਦੇ ਸਕੱਤਰ ਸਜਲ ਕੌਸਰ ਅਤੇ ਇਨ੍ਹਾਂ ਕਲਾਕਾਰਾਂ ਦੇ ਗੁਰੂ ਐਸਐਨਏ ਐਵਾਰਡੀ ਪੰਡਿਤ ਸੁਸ਼ੀਲ ਜੈਨ ਨੇ ਕਲਾਕਾਰਾਂ ਨੂੰ ਯਾਦਗਾਰੀ ਚਿੰਨ੍ਹ ਦੇ ਕੇ ਸਨਮਾਨਿਤ ਕੀਤਾ।
