ਇੰਦੌਰ, 3 ਸਤੰਬਰ, ਪੰਜਾਬੀ ਦੁਨੀਆ ਬਿਊਰੋ:
ਇੰਦੌਰ ਦੇ ਮਹਾਰਾਜਾ ਯਸ਼ਵੰਤਰਾਓ ਹਸਪਤਾਲ ਵਿੱਚ ਹਸਪਤਾਲ ਪ੍ਰਸ਼ਾਸਨ ਦੀ ਗੈਰ ਜ਼ਿੰਮੇਵਾਰਾਨਾ ਪਹੁੰਚ ਕਾਰਨ ਬੁੱਧਵਾਰ ਨੂੰ ਚੂਹਿਆਂ ਦੁਆਰਾ ਕੱਟੇ ਜਾਣ ਕਾਰਨ ਦੂਜੇ ਨਵਜੰਮੇ ਬੱਚੇ ਦੀ ਵੀ ਮੌਤ ਹੋ ਗਈ। ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਦੇਵਾਸ ਤੋਂ ਰੈਫਰ ਕੀਤੀ ਗਈ ਖੰਡਵਾ ਦੀ ਇੱਕ ਹੋਰ ਬੱਚੀ ਦੀ ਵੀ ਇਸੇ ਹਾਲਾਤਾਂ ਵਿੱਚ ਮੌਤ ਹੋ ਗਈ ਸੀ।
ਜ਼ਿਕਰਯੋਗ ਹੈ ਕਿ ਇਲਾਕੇ ਦੇ ਦੋ ਪਰਿਵਾਰ, ਜੋ ਕਿ ਖੰਡਵਾ ਤੋਂ ਲਕਸ਼ਮੀ ਅਤੇ ਦੇਵਾਸ ਤੋਂ ਰੇਹਾਨਾ, ਬਿਹਤਰ ਇਲਾਜ ਦੀ ਭਾਲ ਵਿੱਚ ਰਾਜ ਦੇ ਸਭ ਤੋਂ ਵੱਡੇ ਸਰਕਾਰੀ ਹਸਪਤਾਲ ਆਏ ਸਨ, ਪਰ ਉਹਨਾਂ ਦੋਵਾਂ ਪਰਿਵਾਰਾਂ ਨੂੰ ਸਿਰਫ਼ ਮਾਯੂਸੀ ਮਿਲੀ।
ਦੂਜੇ ਪਾਸੇ ਡਾਕਟਰਾਂ ਨੇ ਪੱਲਾ ਝਾੜਦਿਆਂ ਕਿਹਾ ਹੈ ਕਿ ਬੱਚਿਆਂ ਦੀ ਮੌਤ ਚੂਹਿਆਂ ਦੇ ਕੱਟਣ ਨਾਲ ਨਹੀਂ ਸਗੋਂ ਜਮਾਂਦਰੂ ਪੇਚੀਦਗੀਆਂ ਕਾਰਨ ਹੋਈ ਹੈ।
ਐਮਵਾਈ ਹਸਪਤਾਲ ਦੇ ਸੁਪਰਡੈਂਟ ਅਸ਼ੋਕ ਯਾਦਵ ਨੇ ਕਿਹਾ ਕਿ ਦੋਵੇਂ ਬੱਚਿਆਂ ਨੂੰ ਜਮਾਂਦਰੂ ਅਨੀਮੀਆ ਸੀ ਅਤੇ ਉਨ੍ਹਾਂ ਨੂੰ ਬਾਹਰੋਂ ਰੈਫਰ ਕੀਤਾ ਗਿਆ ਸੀ। ਇੱਕ ਦਾ ਭਾਰ 1 ਕਿਲੋਗ੍ਰਾਮ ਸੀ ਅਤੇ ਦੂਜੇ ਦਾ 1.6 ਕਿਲੋਗ੍ਰਾਮ ਅਤੇ ਹੀਮੋਗਲੋਬਿਨ ਵੀ ਘੱਟ ਸੀ। ਬੱਚਿਆਂ ‘ਤੇ ਦੰਦੀ ਦੇ ਨਿਸ਼ਾਨ ਮੌਜੂਦ ਸਨ ਪਰ ਉਹ ਮੌਤ ਦਾ ਕਾਰਨ ਨਹੀਂ ਬਣਦੇ। ਇੱਕ ਦੀ ਮੌਤ ਹੋ ਗਈ, ਜਦੋਂ ਕਿ ਦੂਜਾ ਗੰਭੀਰ ਹਾਲਤ ਵਿੱਚ ਸੀ ਜਿਸਦੀ ਅੰਤੜੀ ਵਿਕਸਤ ਨਹੀਂ ਸੀ।
ਡਿਪਟੀ ਸੁਪਰਡੈਂਟ ਡਾ. ਜਿਤੇਂਦਰ ਵਰਮਾ ਨੇ ਕਿਹਾ ਕਿ ਇਸ ਕੁੜੀ ਨੂੰ ਜਮਾਂਦਰੂ ਅਨੀਮੀਆ ਵੀ ਸੀ, ਉਸਦੇ ਹੱਥਾਂ ਵਿੱਚ ਵਿਗਾੜ ਸੀ, ਅਤੇ ਸੱਤ ਦਿਨ ਪਹਿਲਾਂ ਉਸਦਾ ਆਪ੍ਰੇਸ਼ਨ ਹੋਇਆ ਸੀ। ਉਸਦੀ ਹਾਲਤ ਵਿੱਚ 3-4 ਦਿਨਾਂ ਤੋਂ ਸੁਧਾਰ ਨਹੀਂ ਹੋ ਰਿਹਾ ਸੀ, ਇਸ ਲਈ ਉਸਨੂੰ ਵੈਂਟੀਲੇਟਰ ‘ਤੇ ਰੱਖਿਆ ਗਿਆ ਸੀ। ਉਂਗਲੀ ‘ਤੇ ਚੂਹੇ ਦਾ ਕੱਟਣਾ ਮਾਮੂਲੀ ਸੀ। ਮੌਤ ਜਮਾਂਦਰੂ ਅਨੀਮੀਆ ਕਾਰਨ ਹੋਈ।
ਹਸਪਤਾਲ ਦੇ ਸਟਾਫ਼ ਨੇ ਮੰਨਿਆ ਕਿ ਇੱਕ ਵੱਡਾ ਚੂਹਾ ਕਈ ਦਿਨਾਂ ਤੋਂ (ਨਿਊਨੇਟਲ ਇੰਟੈਂਸਿਵ ਕੇਅਰ ਯੂਨਿਟ) ਵਿੱਚ ਘੁੰਮ ਰਿਹਾ ਸੀ।
ਉਪ ਮੁੱਖ ਮੰਤਰੀ ਰਾਜੇਂਦਰ ਸ਼ੁਕਲਾ ਨੇ ਕਿਹਾ ਕਿ ਇਹ ਇੱਕ ਗੰਭੀਰ ਮਾਮਲਾ ਹੈ, ਜਿਸ ‘ਤੇ ਤੁਰੰਤ ਕਾਰਵਾਈ ਕੀਤੀ ਗਈ ਹੈ। ਜੇਕਰ ਸਮੇਂ ਸਿਰ ਕੀਟ ਕੰਟਰੋਲ ਕੀਤਾ ਜਾਂਦਾ, ਤਾਂ ਚੂਹੇ ਮੌਜੂਦ ਨਾ ਹੁੰਦੇ। ਕੀਟ ਕੰਟਰੋਲ ਏਜੰਸੀ ‘ਤੇ 1 ਲੱਖ ਰੁਪਏ ਦਾ ਜੁਰਮਾਨਾ ਵੀ ਲਗਾਇਆ ਗਿਆ ਹੈ। ਇਸ ਦੇ ਨਾਲ ਹੀ ਨਰਸਿੰਗ ਸੁਪਰਡੈਂਟ ਨੂੰ ਹਟਾ ਦਿੱਤਾ ਗਿਆ ਹੈ, ਦੋ ਨਰਸਿੰਗ ਅਫਸਰਾਂ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ, ਅਤੇ ਬਾਲ ਰੋਗ ਵਿਭਾਗ ਦੇ ਐਚਓਡੀ ਨੂੰ ਨੋਟਿਸ ਜਾਰੀ ਕੀਤਾ ਗਿਆ ਹੈ।
