ਚੰਡੀਗੜ੍ਹ, 11 ਅਪ੍ਰੈਲ, ਪੰਜਾਬੀ ਦੁਨੀਆ ਬਿਊਰੋ :
ਵਿਸ਼ਵ ਸਿਹਤ ਸੰਗਠਨ (WHO) ਦੇ ਡਾਇਰੈਕਟਰ-ਜਨਰਲ, ਡਾ. ਟੇਡਰੋਸ ਅਡਾਨੋਮ ਘੇਬਰੇਅਸਸ ਨੇ ਇੱਕ ਵਾਰ ਫਿਰ ਤੋਂ ਦੁਨੀਆਂ ਭਰ ਨੂੰ ਸੁਚੇਤ ਕੀਤਾ ਹੈ। ਉਹਨਾਂ ਵਿਸ਼ਵ ਨੂੰ ਸਖ਼ਤ ਚੇਤਾਵਨੀ ਜਾਰੀ ਕਰਦਿਆਂ ਕਿਹਾ ਹੈ ਕਿ ਪੂਰੇ ਵਿਸ਼ਵ ਪੱਧਰ ‘ਤੇ ਕੋਵਿਡ-19 ਵਰਗੀ ਅਗਲੀ ਮਹਾਂਮਾਰੀ ਦਾ ਖਤਰਾ ਮੰਡਰਾਅ ਰਿਹਾ ਹੈ। ਇਹ ਅੱਜ ਜਾਂ ਕਦੋਂ ਦੀ ਗੱਲ ਨਹੀਂ, ਸਗੋਂ ਇਹ ‘20 ਸਾਲਾਂ ਵਿੱਚ’ ਜਾਂ ‘ਕੱਲ੍ਹ’ ਕਦੇ ਵੀ ਆ ਸਕਦੀ ਹੈ ਅਤੇ ਇਸਦਾ ਆਉਣਾ ਅਟੱਲ ਹੈ।
WHO ਮੁਖੀ ਦੇ ਇਸ ਗੰਭੀਰ ਐਲਾਨ ਨੇ ਦੁਨੀਆ ਭਰ ਵਿੱਚ ਹਲਚਲ ਮਚਾ ਦਿੱਤੀ ਹੈ। ਡਾ: ਘੇਬਰੇਅਸਸ ਨੇ ਇਸ ਗੱਲ ‘ਤੇ ਜ਼ੋਰ ਦਿੱਤਾ ਕਿ ਸਰਕਾਰਾਂ ਇਸ ਸਮੇਂ ਮਹਾਂਮਾਰੀ ਦੁਆਰਾ ਪੈਦਾ ਹੋਣ ਵਾਲੇ ਖਤਰਿਆਂ ਨੂੰ ਨਜ਼ਰਅੰਦਾਜ਼ ਕਰ ਰਹੀਆਂ ਹਨ, ਅਤੇ ਆਰਥਿਕ ਤੇ ਭੂ-ਰਾਜਨੀਤਿਕ ਸੰਕਟਾਂ ਵਰਗੀਆਂ ਹੋਰ ਚਿੰਤਾਵਾਂ ਵਿੱਚ ਰੁੱਝੀਆਂ ਹੋਈਆਂ ਹਨ। ਜਿਵੇਂ-ਜਿਵੇਂ ਦੁਨੀਆ ਵੱਖ ਵੱਖ ਦੇਸ਼ਾਂ ਵਿਚ ਚੱਲ ਰਹੀਆਂ ਲੜਕੀਆਂ ਅਤੇ ਆਰਥਿਕ ਅਸਥਿਰਤਾ ਨਾਲ ਜੂਝ ਰਹੀ ਹੈ, ਆਬਾਦੀ ਅਤੇ ਸਰਕਾਰਾਂ ਦੋਵੇਂ ਹੀ ਕੋਵਿਡ-19 ਨੂੰ ਅਤੀਤ ਦੀ ਯਾਦ ਦਿਵਾਉਣ ਲੱਗ ਪਏ ਹਨ। ਹਾਲਾਂਕਿ, ਉਹਨਾਂ ਜ਼ੋਰ ਦੇ ਕੇ ਕਿਹਾ ਕਿ ਅਗਲੀ ਮਹਾਂਮਾਰੀ ਇਨ੍ਹਾਂ ਮੁੱਦਿਆਂ ਦੇ ਹੱਲ ਹੋਣ ਦੀ ਉਡੀਕ ਨਹੀਂ ਕਰੇਗੀ; ਇਹ ਕਿਸੇ ਵੀ ਸਮੇਂ ਹਮਲਾ ਕਰ ਸਕਦੀ ਹੈ।
ਡਾ: ਘੇਬਰੇਅਸਸ ਨੇ ਹਾਜ਼ਰੀਨ ਨੂੰ ਕੋਵਿਡ-19 ਮਹਾਂਮਾਰੀ ਦੇ ਵਿਨਾਸ਼ਕਾਰੀ ਪ੍ਰਭਾਵ ਦੀ ਯਾਦ ਦਿਵਾਈ, ਜਿਸ ਨੇ ਅਧਿਕਾਰਤ ਤੌਰ ‘ਤੇ 70 ਲੱਖ ਜਾਨਾਂ ਲਈਆਂ ਸਨ। ਹਾਲਾਂਕਿ WHO ਦਾ ਅਨੁਮਾਨ ਹੈ ਕਿ ਅਸਲ ਅੰਕੜਾ 20 ਮਿਲੀਅਨ ਤੋਂ ਵੱਧ ਹੈ। ਆਰਥਿਕ ਨਤੀਜੇ ਵੀ ਓਨੇ ਹੀ ਗੰਭੀਰ ਸਨ, ਮਹਾਂਮਾਰੀ ਨੇ ਵਿਸ਼ਵ ਅਰਥਵਿਵਸਥਾ ਨੂੰ 10 ਟ੍ਰਿਲੀਅਨ ਡਾਲਰ ਦਾ ਨੁਕਸਾਨ ਪਹੁੰਚਾਇਆ ਸੀ।
