ਬੀਸੀਸੀਆਈ ਨੇ ਆਸਟ੍ਰੇਲੀਆ ਦੌਰੇ ਲਈ ਸੌਂਪੀ ਵੱਡੀ ਜ਼ਿੰਮੇਵਾਰੀ
ਨਵੀਂ ਦਿੱਲੀ, 4 ਨਵੰਬਰ, ਪੰਜਾਬੀ ਦੁਨੀਆ ਬਿਊਰੋ:
ਪੰਜਾਬ ਦਾ ਪੁੱਤਰ ਅਤੇ ਭਾਰਤੀ ਟੈਸਟ ਟੀਮ ਦੇ ਕਪਤਾਨ ਸ਼ੁਭਮਨ ਗਿੱਲ ਨੂੰ ਵਨ-ਡੇ ਟੀਮ ਦਾ ਵੀ ਕਪਤਾਨ ਥਾਪਿਆ ਗਿਆ ਹੈ। ਉਹ ਰੋਹਿਤ ਸ਼ਰਮਾ ਦੀ ਥਾਂ ਅਗਲੇ ਇੱਕ ਰੋਜ਼ਾ ਕਪਤਾਨ ਵਜੋਂ ਦੇਸ਼ ਦੀ ਅਗਵਾਈ ਕਰਨਗੇ।
ਚੋਣ ਕਮੇਟੀ ਦੇ ਚੇਅਰਮੈਨ ਅਜੀਤ ਅਗਰਕਰ ਨੇ ਸ਼ਨੀਵਾਰ ਨੂੰ ਆਸਟ੍ਰੇਲੀਆ ਵਿਰੁੱਧ 19 ਅਕਤੂਬਰ ਤੋਂ ਪਰਥ ਵਿੱਚ ਸ਼ੁਰੂ ਹੋਣ ਵਾਲੀ ਤਿੰਨ ਮੈਚਾਂ ਦੀ ਇਕ ਦਿਨਾਂ ਸੀਰੀਜ਼ ਲਈ ਟੀਮ ਦਾ ਐਲਾਨ ਕੀਤਾ। ਸ਼ੁਭਮਨ ਗਿੱਲ ਨੂੰ ਰੋਹਿਤ ਦੀ ਜਗ੍ਹਾ ਲੈਣ ਦਾ ਫੈਸਲਾ ਇਸ ਲਈ ਲਿਆ ਗਿਆ ਕਿਉਂਕਿ ਮੌਜੂਦਾ ਟੀਮ ਪ੍ਰਬੰਧਨ ਚਾਹੁੰਦਾ ਹੈ ਕਿ 26 ਸਾਲਾ ਖਿਡਾਰੀ ਦੱਖਣੀ ਅਫਰੀਕਾ, ਜ਼ਿੰਬਾਬਵੇ ਅਤੇ ਨਾਮੀਬੀਆ ਵਿੱਚ ਖੇਡੇ ਜਾਣ ਵਾਲੇ 2027 ਇੱਕ ਰੋਜ਼ਾ ਵਿਸ਼ਵ ਕੱਪ ਵਿੱਚ ਭਾਰਤ ਦੀ ਅਗਵਾਈ ਕਰੇ। ਗਿੱਲ ਹੁਣ ਦੋ ਫਾਰਮੈਟਾਂ (ਟੈਸਟ ਅਤੇ ਇੱਕ ਰੋਜ਼ਾ) ਵਿੱਚ ਕਪਤਾਨ ਹੈ ਅਤੇ ਟੀ-20 ਵਿੱਚ ਉਪ-ਕਪਤਾਨ ਹੈ।
ਅਜੀਤ ਅਗਰਕਰ ਦੀ ਅਗਵਾਈ ਵਾਲੀ ਚੋਣ ਕਮੇਟੀ ਨੇ ਸ਼ਨੀਵਾਰ ਨੂੰ ਆਸਟ੍ਰੇਲੀਆ ਦੌਰੇ ਲਈ ਟੀਮ ਦੀ ਚੋਣ ਲਈ ਮੀਟਿੰਗ ਕੀਤੀ। ਚੋਣਕਾਰਾਂ ਨੇ ਕਪਤਾਨੀ ਬਦਲਣ ਦਾ ਫੈਸਲਾ ਲੈਣ ਤੋਂ ਪਹਿਲਾਂ ਮੁੱਖ ਕੋਚ ਗੌਤਮ ਗੰਭੀਰ ਦੀ ਵੀ ਸਲਾਹ ਲਈ। ਇਸ ਸਾਲ ਦੇ ਸ਼ੁਰੂ ਵਿੱਚ, ਗਿੱਲ ਨੇ ਰੋਹਿਤ ਦੇ ਟੈਸਟ ਕ੍ਰਿਕਟ ਫਾਰਮੈਟ ਤੋਂ ਸੰਨਿਆਸ ਲੈਣ ਤੋਂ ਬਾਅਦ ਟੈਸਟ ਕਪਤਾਨ ਦਾ ਅਹੁਦਾ ਸੰਭਾਲਿਆ ਸੀ।
38 ਸਾਲਾ ਰੋਹਿਤ ਸ਼ਰਮਾ ਨੇ ਦਸੰਬਰ 2021 ਤੋਂ ਭਾਰਤ ਦੇ ਵਨਡੇ ਟੀਮ ਦੀ ਕਪਤਾਨੀ ਸੰਭਾਲੀ ਸੀ। ਉਹਨਾਂ ਨੇ 56 ਵਨਡੇ ਮੈਚਾਂ ਵਿੱਚ ਭਾਰਤ ਦੀ ਅਗਵਾਈ ਕੀਤੀ, ਜਿਸ ਵਿੱਚੋਂ 42 ਜਿੱਤੇ, 12 ਹਾਰੇ, ਇੱਕ ਟਾਈ ਅਤੇ ਇੱਕ ਦਾ ਨਤੀਜਾ ਨਹੀਂ ਨਿਕਲਿਆ। ਉਸਨੇ ਭਾਰਤ ਨੂੰ ਸਟੈਂਡ-ਇਨ ਕਪਤਾਨ ਵਜੋਂ 2018 ਏਸ਼ੀਆ ਕੱਪ ਖਿਤਾਬ ਅਤੇ ਫਿਰ ਕਪਤਾਨ ਵਜੋਂ 2023 ਏਸ਼ੀਆ ਕੱਪ ਖਿਤਾਬ ਦਿਵਾਇਆ। ਉਸਦੀ ਅਗਵਾਈ ਵਿੱਚ, ਭਾਰਤ ਨੇ 2023 ਵਨਡੇ ਵਿਸ਼ਵ ਕੱਪ ਦੇ ਫਾਈਨਲ ਵਿੱਚ ਜਗ੍ਹਾ ਬਣਾਈ। ਉਸਦਾ ਕਾਰਜਕਾਲ ਭਾਰਤ ਨੂੰ ਚੈਂਪੀਅਨਜ਼ ਟਰਾਫੀ ਜਿੱਤਣ ਵਿੱਚ ਸਮਾਪਤ ਹੋਇਆ।
