ਅਭਿਸ਼ੇਕ ਸ਼ਰਮਾ ਦੀਆਂ 74 ਦੌੜਾਂ ਅਤੇ ਸ਼ਿਵਮ ਦੂਬੇ ਦੀ ਘਾਤਕ ਗੇਂਦਬਾਜੀ ਦਾ ਰਿਹਾ ਵੱਡਾ ਯੋਗਦਾਨ
ਦੁਬਈ/ਚੰਡੀਗੜ੍ਹ, 22 ਸਤੰਬਰ, ਪੰਜਾਬੀ ਦੁਨੀਆ ਬਿਊਰੋ:
ਭਾਰਤ ਦੇ ਤੂਫਾਨੀ ਬੱਲੇਬਾਜ ਅਭਿਸ਼ੇਕ ਸ਼ਰਮਾ ਨੇ 39 ਗੇਂਦਾਂ ‘ਤੇ 74 ਦੌੜਾਂ ਅਤੇ ਉਪ ਕਪਤਾਨ ਸ਼ੁਭਮਨ ਗਿੱਲ ਨੇ 28 ਗੇਂਦਾਂ ਵਿੱਚ 48 ਦੌੜਾਂ ਦੀਆਂ ਸ਼ਾਨਦਾਰ ਪਾਰੀਆਂ ਸਦਕਾ ਭਾਰਤ ਨੇ ਪਾਕਿਸਤਾਨ ਵਿਰੁੱਧ ਇੱਕ ਵਾਰ ਫਿਰ 6 ਵਿਕਟਾਂ ਨਾਲ ਧਮਾਕੇਦਾਰ ਜਿੱਤ ਦਰਜ ਕੀਤੀ ਹੈ। ਅਭਿਸ਼ੇਕ ਸ਼ਰਮਾ ਨੂੰ ਬਿਹਤਰ ਪ੍ਰਦਰਸ਼ਨ ਸਦਕਾ ਮੈਨ ਆਫ ਦੀ ਮੈਚ ਚੁਣਿਆ ਗਿਆ।
ਇੱਥੇ ਦੁਬਈ ਦੇ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ ਵਿੱਚ ਖੇਡੇ ਗਏ ਏਸ਼ੀਆ ਕੱਪ ਦੇ ਸੁਪਰ 4 ਦੇ ਦੂਜੇ ਮੈਚ ਵਿੱਚ ਭਾਰਤ ਨੇ ਪਾਕਿਸਤਾਨ ਵੱਲੋਂ ਮਿੱਥੇ 172 ਦੌੜਾਂ ਦੇ ਟੀਚੇ ਦੇ ਜਵਾਬ ਵਿੱਚ ਚਾਰ ਵਿਕਟਾਂ ਤੇ 174 ਦੌੜਾਂ ਬਣਾਈਆਂ। ਭਾਰਤ ਨੇ ਸ਼ੁਰੂਆਤ ਵਿੱਚ ਹੀ ਮੈਚ ‘ਤੇ ਦਬਦਬਾ ਬਣਾਇਆ ਅਤੇ ਪਹਿਲੇ 10 ਓਵਰਾਂ ਵਿੱਚ 105 ਦੌੜਾਂ ਦੀ ਸ਼ੁਰੂਆਤੀ ਸਾਂਝੇਦਾਰੀ ਨਿਭਾਈ। ਜਿਸ ਕਾਰਨ ਪਾਕਿਸਤਾਨ ਨੂੰ ਇਸ ਮੁਕਾਬਲੇ ਵਿੱਚੋਂ ਬਾਹਰ ਹੀ ਕਰ ਦਿੱਤਾ। ਸ਼ਰਮਾ ਦੀ ਸ਼ਾਨਦਾਰ ਪਾਰੀ, ਜਿਸ ਵਿੱਚ ਪੰਜ ਛੱਕੇ ਅਤੇ ਛੇ ਚੌਕੇ ਸ਼ਾਮਲ ਸਨ, ਵਿੱਚ 24 ਗੇਂਦਾਂ ਵਿੱਚ ਤੇਜ਼ ਅਰਧ ਸੈਂਕੜਾ ਸ਼ਾਮਲ ਸੀ ਅਤੇ ਭਾਰਤ ਨੂੰ 172 ਦੌੜਾਂ ਦੇ ਟੀਚੇ ਦਾ ਪੂਰਾ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਈ।
ਪਾਕਿਸਤਾਨ ਨੂੰ ਆਖਰਕਾਰ ਦਸਵੇਂ ਓਵਰ ਵਿੱਚ ਸਫਲਤਾ ਮਿਲੀ ਜਦੋਂ ਫਹੀਮ ਅਸ਼ਰਫ ਨੇ ਸ਼ੁਭਮਨ ਗਿੱਲ ਨੂੰ ਬੋਲਡ ਕੀਤਾ, ਜੋ ਅਰਧ ਸੈਂਕੜਾ ਬਣਾਉਣ ਤੋਂ ਸਿਰਫ਼ ਦੋ ਦੌੜਾਂ ਦੂਰ ਸੀ। ਉਸ ਤੋਂ ਬਾਅਦ ਆਏ ਸੂਰਿਆਕੁਮਾਰ ਯਾਦਵ ਨੂੰ ਬਿਨਾਂ ਕੁੱਲ ਜੋੜਨ ਦੇ ਜਲਦੀ ਆਊਟ ਕਰ ਦਿੱਤਾ ਗਿਆਤਿਲਕ ਵਰਮਾ (19 ਗੇਂਦਾਂ ਵਿੱਚ ਨਾਬਾਦ 30 ਦੌੜਾਂ) ਅਤੇ ਹਾਰਦਿਕ ਪਾਂਡਿਯਾ (7 ਗੇਂਦਾਂ ਵਿੱਚ ਨਾਬਾਦ 7 ਦੌੜਾਂ) ਨੇ ਭਾਰਤ ਨੂੰ 7 ਗੇਂਦਾਂ ਬਾਕੀ ਰਹਿੰਦਿਆਂ ਹੀ ਜਿੱਤ ਦਿਵਾਈ। ਪਾਕਿਸਤਾਨ ਲਈ ਹਾਰਿਸ ਰਉਫ ਨੇ ਦੋ ਵਿਕਟਾਂ ਲਈਆਂ, ਜਦਕਿ ਅਬਰਾਰ ਅਹਿਮਦ ਅਤੇ ਅਸ਼ਰਫ ਨੇ ਇੱਕ-ਇੱਕ ਵਿਕਟ ਲਈ।
ਇਸ ਤੋਂ ਪਹਿਲਾਂ ਪਾਕਿਸਤਾਨ ਨੇ ਭਾਰਤ ਸਾਹਮਣੇ 5 ਵਿਕਟਾਂ ਗੁਆ ਕੇ 171 ਦੌੜਾਂ ਦਾ ਟੀਚਾ ਰੱਖਿਆ ਸੀ। ਸਾਹਿਬਜ਼ਾਦਾ ਫਰਹਾਨ ਨੇ ਸਭ ਤੋਂ ਵੱਧ 58 ਦੌੜਾਂ ਬਣਾਈਆਂ, ਜਦੋਂ ਕਿ ਸ਼ਿਵਮ ਦੂਬੇ ਭਾਰਤ ਦਾ ਸਭ ਤੋਂ ਪ੍ਰਭਾਵਸ਼ਾਲੀ ਗੇਂਦਬਾਜ਼ ਰਿਹਾ, ਜਿਸਨੇ ਮਹੱਤਵਪੂਰਨ 2 ਵਿਕਟਾਂ ਲਈਆਂ। ਦੂਬੇ ਨੇ ਫਰਹਾਨ (45 ਗੇਂਦਾਂ ‘ਤੇ 58) ਅਤੇ ਸੈਮ ਅਯੂਬ (17 ਗੇਂਦਾਂ ‘ਤੇ 21) ਦੀਆਂ ਵਿਕਟਾਂ ਹਾਸਲ ਕੀਤੀਆਂ, ਜਿਨ੍ਹਾਂ ਨੇ ਦੂਜੀ ਵਿਕਟ ਲਈ 72 ਦੌੜਾਂ ਦੀ ਕੀਮਤੀ ਸਾਂਝੇਦਾਰੀ ਕੀਤੀ, ਜਿਸ ਨਾਲ ਪਾਕਿਸਤਾਨ ਨੇ 10 ਓਵਰਾਂ ਵਿੱਚ 91/1 ਦੌੜਾਂ ਬਣਾਈਆਂ ਸਨ।
ਦੂਬੇ ਨੇ 11ਵੇਂ ਓਵਰ ਵਿੱਚ ਅਯੂਬ ਨੂੰ ਆਊਟ ਕਰਕੇ ਪਾਕਿਸਤਾਨ ਨੂੰ 93/2 ਦੇ ਸਕੋਰ ‘ਤੇ ਇਸ ਸਾਂਝੇਦਾਰੀ ਨੂੰ ਤੋੜਿਆ, ਇਸ ਤੋਂ ਬਾਅਦ ਉਨ੍ਹਾਂ ਨੇ 15ਵੇਂ ਓਵਰ ਵਿੱਚ ਫਰਹਾਨ ਨੂੰ ਆਊਟ ਕਰਕੇ ਵਿਰੋਧੀ ਟੀਮ ਨੂੰ 115/4 ਦੇ ਸਕੋਰ ‘ਤੇ ਮੁਸ਼ਕਲ ਵਿੱਚ ਪਾ ਦਿੱਤਾ। ਪਾਕਿਸਤਾਨ ਵੱਲੋਂ ਮੁਹੰਮਦ ਨਵਾਜ਼ (21) ਅਤੇ ਫਹੀਮ ਅਸ਼ਰਫ਼ (ਨਾਬਾਦ 20) ਨੇ ਹੋਰ ਮਹੱਤਵਪੂਰਨ ਯੋਗਦਾਨ ਪਾਇਆ। ਭਾਰਤ ਵੱਲੋਂ ਹਾਰਦਿਕ ਪਾਂਡਿਯਾ ਅਤੇ ਕੁਲਦੀਪ ਨੇ ਇੱਕ-ਇੱਕ ਵਿਕਟ ਹਾਸਲ ਕੀਤੀ।
ਮੈਚ ਵਿੱਚ ਭਾਰਤ ਦੀਆਂ ਫੀਲਡਿੰਗ ਗਲਤੀਆਂ ਨੇ ਪਾਕਿਸਤਾਨ ਦੀ ਮਦਦ ਕੀਤੀ, ਅਭਿਸ਼ੇਕ ਸ਼ਰਮਾ ਨੇ ਦੋ ਕੈਚ ਛੱਡੇ, ਕੁਲਦੀਪ ਯਾਦਵ ਨੇ ਇੱਕ ਕੈਚ ਅਤੇ ਸ਼ੁਭਮਨ ਗਿੱਲ ਨੇ ਦੇਰ ਨਾਲ ਇੱਕ ਹੋਰ ਕੈਚ ਛੱਡਿਆ, ਜਿਸ ਨਾਲ ਪਾਕਿਸਤਾਨ ਨੂੰ 20 ਓਵਰਾਂ ਵਿੱਚ 171/5 ਦਾ ਸਕੋਰ ਬਣਾਉਣ ਦਾ ਮੌਕਾ ਮਿਲਿਆ।
