ਚੰਡੀਗੜ੍ਹ, 23 ਅਗਸਤ, ਪੰਜਾਬੀ ਦੁਨੀਆ ਬਿਊਰੋ :
ਤਿੰਨ ਦਿਨਾਂ ਦੇ ਹੋਮੀ ਭਾਭਾ ਕੈਂਸਰ ਕੌਂਕਲੇਵ (HBCC) 2025 ਦੇ ਦੂਜੇ ਦਿਨ ਪੰਜਾਬ ਦੇ ਮਾਣਯੋਗ ਗਵਰਨਰ ਅਤੇ ਚੰਡੀਗੜ੍ਹ ਦੇ ਪ੍ਰਸ਼ਾਸਕ, ਸ਼੍ਰੀ ਗੁਲਾਬ ਚੰਦ ਕਟਾਰੀਆ ਨੇ ਹੋਮੀ ਭਾਭਾ ਕੈਂਸਰ ਹਸਪਤਾਲ ਅਤੇ ਰਿਸਰਚ ਸੈਂਟਰ (HBCH&RC), ਪੰਜਾਬ ਵਿੱਚ ਆਧੁਨਿਕ ਰੋਬੋਟਿਕ-ਅਸਿਸਟਡ ਕੈਂਸਰ ਸਰਜਰੀ ਸਹੂਲਤ ਦਾ ਉਦਘਾਟਨ ਕੀਤਾ।
ਇਹ ਪ੍ਰਤਿਸ਼ਠਿਤ ਕੌਂਕਲੇਵ ਨਰਸੀ ਮੋੰਜੀ ਇੰਸਟੀਚਿਊਟ ਆਫ ਮੈਨੇਜਮੈਂਟ ਸਟੱਡੀਜ਼ (NMIMS), ਚੰਡੀਗੜ੍ਹ ਵਿਖੇ ਆਯੋਜਿਤ ਕੀਤਾ ਗਿਆ ਹੈ, ਜਿਸ ਵਿੱਚ ਦੇਸ਼-ਪੱਧਰੀਆਂ ਪ੍ਰਮੁੱਖ ਓਂਕੋਲੋਜਿਸਟਾਂ, ਖੋਜਕਰਤਾਵਾਂ ਅਤੇ ਹੈਲਥਕੇਅਰ ਮਾਹਿਰਾਂ ਨੇ ਭਾਗ ਲਿਆ ਹੈ।
ਸਮਾਰੋਹ ਵਿੱਚ ਮੁੱਖ ਮਹਿਮਾਨ ਵਜੋਂ ਮਾਣਯੋਗ ਗਵਰਨਰ ਸ਼੍ਰੀ ਗੁਲਾਬ ਚੰਦ ਕਟਾਰੀਆ ਸ਼ਾਮਲ ਹੋਏ। ਇਸ ਮੌਕੇ ਉਨ੍ਹਾਂ ਨੇ HBCH&RC ਪੰਜਾਬ ਵਿੱਚ ਰੋਬੋਟਿਕ-ਅਸਿਸਟਡ ਕੈਂਸਰ ਸਰਜਰੀ ਦੀ ਸ਼ੁਰੂਆਤ ਕੀਤੀ। ਹਸਪਤਾਲ ਦੀਆਂ ਸੇਵਾਵਾਂ ਦੀ ਪ੍ਰਸ਼ੰਸਾ ਕਰਦੇ ਹੋਏ ਉਨ੍ਹਾਂ ਨੇ ਕਿਹਾ, “ਪਿਛਲੇ 80 ਸਾਲਾਂ ਵਿੱਚ ਟਾਟਾ ਮੈਮੋਰੀਅਲ ਸੈਂਟਰ ਨੇ ਵਿਸ਼ਵ ਪੱਧਰ ‘ਤੇ ਕੈਂਸਰ ਇਲਾਜ ਦੇ ਖੇਤਰ ਵਿੱਚ ਵਿਲੱਖਣ ਪਛਾਣ ਬਣਾਈ ਹੈ। ਦੇਸ਼ ਵਿੱਚ ਕੈਂਸਰ ਮਰੀਜ਼ਾਂ ਦੀ ਵੱਧ ਰਹੀ ਗਿਣਤੀ ਦੇ ਕਾਰਨ TMC ਦਾ ਵਿਸਥਾਰ ਜ਼ਰੂਰੀ ਸੀ। ਅੱਜ ਦੇਸ਼ ਭਰ ਵਿੱਚ 9 ਕੇਂਦਰ ਸਥਾਪਿਤ ਹੋਏ ਹਨ, ਜਿਨ੍ਹਾਂ ਵਿੱਚੋਂ ਦੋ ਪੰਜਾਬ ਵਿੱਚ ਹਨ—ਇੱਕ ਐਸਾ ਖੇਤਰ ਜਿਸਨੂੰ ਇਸ ਤਰ੍ਹਾਂ ਦੀਆਂ ਤਕਨੀਕੀ ਸਹੂਲਤਾਂ ਦੀ ਸਭ ਤੋਂ ਵੱਧ ਲੋੜ ਸੀ।”
ਇਸ ਸਮਾਰੋਹ ਵਿਚ ਭਾਗ ਲੈਣ ਵਾਲੇ ਪ੍ਰਮੁੱਖ ਡਾਕਟਰਾਂ ਵਿਚ ਡਾ. ਸ਼੍ਰੀਪਦ ਡੀ. ਬਾਨਾਵਲੀ (ਡਾਇਰੈਕਟਰ, ਅਕੈਡਮਿਕਸ, ਟਾਟਾ ਮੈਮੋਰੀਅਲ ਸੈਂਟਰ), ਡਾ. ਏ.ਕੇ. ਅਟਰੀ (ਡਾਇਰੈਕਟਰ ਪ੍ਰਿੰਸੀਪਲ, GMCH-32 ਚੰਡੀਗੜ੍ਹ), ਡਾ. ਸਤਯਜੀਤ ਪ੍ਰਧਾਨ (ਡਾਇਰੈਕਟਰ, HBCH ਅਤੇ MPMMCC ਵਾਰਾਣਸੀ) ਅਤੇ ਡਾ. ਉਮੇਸ਼ ਮਹਾਂਤਸ਼ੈੱਟੀ (ਡਾਇਰੈਕਟਰ, HBCH&RC ਵਿਜਾਗ) ਸ਼ਾਮਲ ਸਨ।
ਸਮਾਰੋਹ ਦੀ ਸ਼ੁਰੂਆਤ ਡਾ. ਆਸ਼ਿਸ਼ ਗੁਲੀਆ, ਡਾਇਰੈਕਟਰ, HBCH&RC ਪੰਜਾਬ ਵੱਲੋਂ ਸਵਾਗਤ ਭਾਸ਼ਣ ਨਾਲ ਹੋਈ। ਇਸ ਤੋਂ ਬਾਅਦ ਸਾਲਾਨਾ ਮੈਗਜ਼ੀਨ ਜਾਰੀ ਕੀਤੀ ਗਈ ਅਤੇ ਰੋਬੋਟਿਕ ਕੈਂਸਰ ਸਰਜਰੀ ਦੀ ਸ਼ੁਰੂਆਤ ਕੀਤੀ ਗਈ।
ਇਸ ਦੌਰਾਨ ਗਵਰਨਰ ਕਟਾਰੀਆ ਨੇ ਕਿਹਾ ਕਿ “ਉਦਯੋਗਿਕ ਪ੍ਰਦੂਸ਼ਣ, ਸਤਲੁਜ ਦਰਿਆ ਦਾ ਪ੍ਰਦੂਸ਼ਣ, ਰਸਾਇਣਿਕ ਖਾਦਾਂ ਦਾ ਵਧਦਾ ਇਸਤੇਮਾਲ ਅਤੇ ਜੀਵਨ ਸ਼ੈਲੀ ਵਿੱਚ ਬਦਲਾਵ ਕੈਂਸਰ ਦੇ ਵਧ ਰਹੇ ਬੋਝ ਲਈ ਜ਼ਿੰਮੇਵਾਰ ਹਨ। ਜੇ ਅਸੀਂ ਕੈਂਸਰ ਨੂੰ ਕਾਬੂ ਕਰਨਾ ਹੈ ਤਾਂ ਸਾਨੂੰ ਰੋਕਥਾਮ ਅਤੇ ਜਾਗਰੂਕਤਾ ‘ਤੇ ਧਿਆਨ ਕੇਂਦ੍ਰਿਤ ਕਰਨਾ ਹੋਵੇਗਾ।” ਉਹਨਾਂ ਕਿਹਾ ਕਿ ਤੰਦਰੁਸਤ ਸਮਾਜ ਸਦਕਾ ਹੀ ਇੱਕ ਤੰਦਰੁਸਤ ਰਾਸ਼ਟਰ ਦੀ ਨੀਂਹ ਰੱਖੀ ਜਾ ਸਕਦੀ ਹੈ। ਕੋਈ ਵੀ ਦੇਸ਼ ਤੰਦਰੁਸਤੀ ਨੂੰ ਪਹਿਲ ਦੇ ਬਿਨਾ ਪ੍ਰਗਤੀ ਨਹੀਂ ਕਰ ਸਕਦਾ।
HBCH&RC ਪੰਜਾਬ ਵਿੱਚ ਰੋਬੋਟਿਕ ਕੈਂਸਰ ਸਰਜਰੀ ਦੀ ਸ਼ੁਰੂਆਤ
ਰੋਬੋਟਿਕ ਸਰਜਰੀ ਦੀ ਸ਼ੁਰੂਆਤ HBCH&RC ਪੰਜਾਬ ਲਈ ਕੈਂਸਰ ਇਲਾਜ ਵਿੱਚ ਇਕ ਵੱਡੀ ਉੱਪਲਬਧੀ ਹੈ। ਇਹ ਤਕਨਾਲੋਜੀ ਡਾਕਟਰਾਂ ਨੂੰ ਗੁੰਝਲਦਾਰ ਸਰਜਰੀਆਂ ਵਧੀਆ ਢੰਗ ਨਾਲ ਕਰਨ ਦੇ ਯੋਗ ਬਣਾਉਂਦੀ ਹੈ, ਜਿਸ ਨਾਲ ਘੱਟ ਖੂਨ ਵਗਦਾ ਹੈ ਅਤੇ ਮਰੀਜ਼ ਤੇਜ਼ੀ ਨਾਲ ਸਿਹਤਮੰਦ ਹੁੰਦਾ ਹੈ। ਇਸ ਸ਼ੁਰੂਆਤ ਨਾਲ HBCH&RC ਪੰਜਾਬ ਉੱਤਰੀ ਭਾਰਤ ਦੇ ਕੁਝ ਹੀ ਸਰਕਾਰੀ ਕੈਂਸਰ ਹਸਪਤਾਲਾਂ ਵਿੱਚ ਸ਼ਾਮਲ ਹੋ ਗਿਆ ਹੈ, ਜੋ ਰੋਬੋਟਿਕ-ਅਸਿਸਟਡ ਸਰਜਰੀ ਸੇਵਾਵਾਂ ਪ੍ਰਦਾਨ ਕਰਦੇ ਹਨ।
ਇਸ ਦੌਰਾਨ ਡਾ. ਆਸ਼ਿਸ਼ ਗੁਲੀਆ ਨੇ ਘੋਸ਼ਣਾ ਕੀਤੀ ਕਿ ਆਮ ਸ਼੍ਰੇਣੀ ਦੇ ਮਰੀਜ਼ਾਂ ਲਈ ਪਹਿਲੀਆਂ 80 ਰੋਬੋਟਿਕ ਸਰਜਰੀਆਂ ਮੁਫ਼ਤ ਕੀਤੀਆਂ ਜਾਣਗੀਆਂ। ਇਸ ਕੌਂਕਲੇਵ ਵਿੱਚ ਲੈਕਚਰ, ਡੀਬੇਟ, ਪੈਨਲ ਡਿਸਕਸ਼ਨ ਅਤੇ ਸੁਖਨਾ ਝੀਲ ਵਿਖੇ ਖ਼ਾਸ ਕੈਂਸਰ ਅਵੇਰਨੈਸ ਵਾਕਾਥਾਨ ਵੀ ਹੋਵੇਗਾ।
ਸਮਾਰੋਹ ਦਾ ਸਮਾਪਨ ਡਾ. ਅਲੋਕ ਕੇ. ਗੋਇਲ, ਆਰਗੇਨਾਈਜ਼ਿੰਗ ਸਕੱਤਰ, ਵੱਲੋਂ ਧੰਨਵਾਦ ਪ੍ਰਸਤਾਵ ਨਾਲ ਕੀਤਾ ਗਿਆ, ਜਿਸ ਵਿੱਚ ਉਨ੍ਹਾਂ ਨੇ ਮਹਾਨੁਭਾਵਾਂ, ਫੈਕਲਟੀ ਅਤੇ ਡੈਲੀਗੇਟਾਂ ਦੇ ਯੋਗਦਾਨ ਦੀ ਪ੍ਰਸ਼ੰਸਾ ਕੀਤੀ।
