ਤ੍ਰਿਸ਼ੂਰ (ਕੇਰਲ), 12 ਅਗਸਤ, ਪੰਜਾਬੀ ਦੁਨੀਆ ਬਿਊਰੋ:
ਕੇਰਲ ਦੇ ਤ੍ਰਿਸ਼ੂਰ ਜ਼ਿਲ੍ਹੇ ਵਿੱਚ ਇੱਕ ਫਲੈਟ ਦੀ ਮਾਲਕ ਔਰਤ ਨੇ ਸ਼ਿਕਾਇਤ ਦਰਜ ਕਰਵਾਈ ਹੈ ਕਿ ਉਸਦੀ ਜਾਣਕਾਰੀ ਤੋਂ ਬਿਨਾਂ, ਉਸਦੇ ਘਰ ਦੇ ਪਤੇ ਦੀ ਦੁਰਵਰਤੋਂ ਕਰਕੇ 9 ਜਾਅਲੀ ਵੋਟਾਂ ਦਰਜ ਕੀਤੀਆਂ ਗਈਆਂ ਹਨ। ਇਹ ਬੇਨਿਯਮੀਆਂ ਪੂਨਕੁੰਨਮ ਦੇ ਕੈਪੀਟਲ ਵਿਲੇਜ ਅਪਾਰਟਮੈਂਟਸ ਦੇ ਫਲੈਟ ਨੰਬਰ 4C ਵਿੱਚ ਸਾਹਮਣੇ ਆਈਆਂ ਹਨ, ਜਿੱਥੇ ਫਲੈਟ ਮਾਲਕ ਪ੍ਰਸੰਨਾ ਨੇ ਕਿਹਾ ਕਿ ਉਹ ਘਰ ਵਿੱਚ ਇਕੱਲੀ ਰਹਿੰਦੀ ਹੈ, ਅਤੇ ਉਸਦੀ ਵੋਟ ਤ੍ਰਿਸ਼ੂਰ ਵਿੱਚ ਹੈ।
ਦੱਸਣਯੋਗ ਹੈ ਕਿ ਤ੍ਰਿਸ਼ੂਰ ਕੇਰਲ ਦੀ ਇੱਕੋ-ਇੱਕ ਲੋਕ ਸਭਾ ਸੀਟ ਸੀ ਜਿਸ ‘ਤੇ ਭਾਜਪਾ ਨੇ 2024 ਵਿੱਚ ਜਿੱਤ ਹਾਸਲ ਕੀਤੀ ਸੀ, ਜਿਸ ਵਿੱਚ ਸੁਰੇਸ਼ ਗੋਪੀ ਨੇ LDF ਦੇ ਸੁਨੀਲ ਕੁਮਾਰ ਅਤੇ UDF ਦੇ ਕੇ ਮੁਰਲੀਧਰਨ ਨੂੰ ਹਰਾਇਆ ਸੀ।
ਸ੍ਰੀਮਤੀ ਪ੍ਰਸੰਨਾ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਉਸਦੇ ਪਰਿਵਾਰ ਵਿੱਚ ਚਾਰ ਬਾਲਗ ਅਤੇ ਦੋ ਬੱਚੇ ਹਨ, ਬਾਕੀ ਬਾਲਗ ਆਪਣੇ ਜੱਦੀ ਪਿੰਡ ਪੂਚੀਨੀਪਾਦਮ ਵਿੱਚ ਵੋਟ ਪਾਉਣ ਲਈ ਰਜਿਸਟਰਡ ਹਨ। ਉਸਨੇ ਕਿਹਾ ਕਿ ਉਸਨੂੰ 9 ਵਾਧੂ ਨਾਵਾਂ ਬਾਰੇ ਉਦੋਂ ਪਤਾ ਲੱਗਿਆ, ਜਦੋਂ ਕਿਸੇ ਨੇ ਤਸਦੀਕ ਲਈ ਉਸ ਨਾਲ ਸੰਪਰਕ ਕੀਤਾ।
ਉਸਨੇ ਜ਼ਿਲ੍ਹਾ ਕੁਲੈਕਟਰ ਨੂੰ ਸੌਂਪੀ ਗਈ ਸ਼ਿਕਾਇਤ ‘ਤੇ ਦਸਤਖਤ ਕਰਦਿਆਂ ਕਿਹਾ “ਅਸੀਂ ਉਨ੍ਹਾਂ ਵਿੱਚੋਂ ਕਿਸੇ ਨੂੰ ਨਹੀਂ ਜਾਣਦੇ। ਅਸੀਂ ਇੱਥੇ ਚਾਰ ਸਾਲਾਂ ਤੋਂ ਰਹਿ ਰਹੇ ਹਾਂ। ਸਾਡੀ ਸਹਿਮਤੀ ਤੋਂ ਬਿਨਾਂ ਸਾਡੇ ਪਤੇ ‘ਤੇ ਨਾਮ ਜੋੜਨਾ ਸਹੀ ਨਹੀਂ ਹੈ।”
ਦੂਜੇ ਪਾਸੇ ਸੀਪੀਐਮ ਵਰਕਰਾਂ ਨੇ ਦੋਸ਼ ਲਗਾਇਆ ਕਿ ਵਾਟਰ ਲਿਲੀ ਅਤੇ ਕੈਪੀਟਲ ਵਿਲੇਜ ਵਰਗੇ ਹੋਰ ਪੂਨਕੁੰਨਮ ਫਲੈਟਾਂ ਵਿੱਚ ਵੀ ਇਸੇ ਤਰ੍ਹਾਂ ਦੀਆਂ ਵੋਟਰ ਸੂਚੀ ਬੇਨਿਯਮੀਆਂ ਹਨ। ਉਨ੍ਹਾਂ ਦਾਅਵਾ ਕੀਤਾ ਕਿ ਖਾਲੀ ਫਲੈਟਾਂ ਨੂੰ ਦੂਜੇ ਜ਼ਿਲ੍ਹਿਆਂ ਤੋਂ ਵੋਟਾਂ ਤਬਦੀਲ ਕਰਨ ਲਈ ਜਾਅਲੀ ਪਤਿਆਂ ਵਜੋਂ ਵਰਤਿਆ ਗਿਆ ਸੀ। ਉਨ੍ਹਾਂ ਕਿਹਾ ਕਿ ਅਸਲ ਫਲੈਟ ਮਾਲਕ, ਇਨ੍ਹਾਂ ਲੋਕਾਂ ਨੂੰ ਜਾਣਦਾ ਤੱਕ ਵੀ ਨਹੀਂ ਹੈ, ਜੋ ਇਸ ਮੁੱਦੇ ਨੂੰ ਗੰਭੀਰ ਬਣਾਉਂਦਾ ਹੈ।
